पत्रकार परिचयपत्र देखाउँदै लागुऔषध कारोबार गर्ने तीन जना पक्राउ
पढ्न लाग्ने समय :
पत्रकारको परिचयपत्र बोकेर लागुऔषध कारोबार हुने गरेको तथ्य अनुसन्धानका क्रममा खुलेको छ। लागूऔषध नियन्त्रण ब्युरोले पत्रकारको परिचयपत्र देखाउँदै लागुऔषध ओसारपसारमा संलग्न तीन जनालाई पक्राउ गरेको जनाएको छ।
ब्युरोको शाखा कार्यालय बर्दिबासबाट खटिएको प्रहरी टोलीले बुधबार सिन्धुलीको दुधौली नगरपालिका–९ बाट बा.१६ च ७८४६ नम्बरको कारसहित तीन जनालाई पक्राउ गरेको हो।
पक्राउ पर्नेमा सिरहाको लक्ष्मीपुर गाउँपालिका निवासी २६ वर्षीय उमेश कुमार यादव, लहान नगरपालिका–१० निवासी ३० वर्षीय रमेश कुमार राम र लक्ष्मीपुर गाउँपालिका–२ निवासी २५ वर्षीय गुल्सन प्रसाद साह रहेका छन्।
प्रहरीका अनुसार उनीहरू सिरहाको मिर्चैयाबाट कारमा खैरो हेरोइन लिएर काठमाडौंतर्फ आउँदै थिए। कार चालक उमेश यादवको साथबाट लहान–२२, सिरहा ठेगाना उल्लेख भएको जनजागरण खबर को पत्रकार परिचयपत्र बरामद भएको लागूऔषध नियन्त्रण ब्युरोका एसएसपी सुवास बोहराले जानकारी दिएका छन्।
प्रहरीले आरोपीहरूले कारको गियर बक्समा लुकाएर ल्याएको अवस्थामा ४४ ग्राम ३४० मिलिग्राम खैरो हेरोइन बरामद गरेको जनाएको छ। साथै, उक्त कार हुलास फाइनान्सबाट किस्ताबन्दीमा खरिद गरिएको पनि अनुसन्धानबाट खुलेको प्रहरीले जनाएको छ।
घटनाका सम्बन्धमा इलाका प्रहरी कार्यालय डकाहा, सिन्धुलीले थप अनुसन्धान गरिरहेको छ।
