सुदूरपश्चिममा निर्वाचनको तयारी पूरा
पढ्न लाग्ने समय :
धनगढीः सुदूरपश्चिममा निर्वाचनको तयारी पूरा भएको छ।
फागुन २१ गते हुने प्रतिनिधि सभा सदस्यको निर्वाचनको ९५ प्रतिशत तयारी पूरा भएको प्रदेश निर्वाचन अधिकारी प्रेमराज भट्टले बताए।
सुदूरपश्चिम प्रदेशका १६ निर्वाचन क्षेत्रमा निर्वाचन सामग्री पुगिसकेको जानकारी दिइएको छ। निर्वाचनका लागि कर्मचारी खटाउने काम सम्पन्न भएको बताउँदै प्रदेश निर्वाचन अधिकारी भट्टले उनीहरूलाई आवश्यक तालिमसमेत दिइएको बताए।
सुदूरपश्चिममा फागुन ३ गतेबाट सुरु भएको मतदाता शिक्षा फागुन १७ गतेसम्म चल्नेछ। सुदूरपश्चिमका ७३४ वडामै मतदाता शिक्षा कार्यक्रम चलीरहेको प्रदेश निर्वाचन अधिकारी भट्टले बताए।
निर्वाचनका लागि सुदूरपश्चिमका सबै निर्वाचन क्षेत्रमा १५ हजार कर्मचारी खटिने भएका छन्। मतदानमा खटिने कर्मचारीहरूलाई तालिम दिने काम सम्पन्न भएको छ भने निर्वाचन सामग्रीसहित कर्मचारीहरू फागुन १७ गतेभित्र मतदान केन्द्रमा पुग्ने बताइएको छ।
यो पटक प्रतिनिधि सभा प्रत्यक्ष र समानुपातिक गरी दुई वटा मतपत्रमा मतदान गर्नुपर्ने छ। पहिलो हुने निर्वाचित हुने निर्वाचन प्रणालीका लागि सेतोमा रातो र समानुपातिकका लागि सेतोमा कालो मतपत्र रहेको प्रदेश निर्वाचन अधिकारी भट्टले बताए।
