सहकारी रकम हिनामिना मुद्दाका फरार प्रतिवादी पक्राउ

सहकारी रकम हिनामिना मुद्दामा अदालतबाट दोषी ठहर भई कैद तथा जरिवाना सजाय सुनाइएका एक प्रतिवादीलाई कञ्चनपुर प्रहरीले पक्राउ गरेको छ।

जिल्ला प्रहरी कार्यालय कञ्चनपुरका अनुसार सम्मानित जिल्ला अदालत कञ्चनपुरको २०८२ मंसिर २ गतेको फैसलाअनुसार सहकारी रकम हिनामिना मुद्दामा २ वर्ष कैद र ८ लाख ८७ हजार २ सय ७८ रुपैयाँ जरिवाना सजाय तोकिएका भीमदत्त नगरपालिका–१८ का ४१ वर्षीय सिद्धराज सोतीलाई सोमबार दिउँसो पक्राउ गरिएको हो।

फैसला कार्यान्वयनको क्रममा जिल्ला प्रहरी कार्यालय कञ्चनपुरबाट खटिएको प्रहरी टोलीले उनलाई आफ्नै घरबाट पक्राउ गरेको जनाएको छ।

पक्राउ परेका सोतीलाई अदालतको फैसला कार्यान्वयनका लागि सम्बन्धित निकायमा पेश गर्ने तथा आवश्यक कानुनी प्रक्रिया अगाडि बढाइएको प्रहरीले जनाएको छ।