दुई दशकपछि शैक्षिक क्यालेन्डर लागु गर्दै त्रिवि
पढ्न लाग्ने समय :
काठमाडौं । त्रिभुवन विश्वविद्यालयले यस वर्ष भर्ना भएका विद्यार्थीका लागि सञ्चालन हुने भर्ना, पढाइ, परीक्षा तथा नतिजाको कार्यतालिका समेटेर शैक्षिक क्यालेन्डर सार्वजनिक गरेको छ ।
विद्यार्थी भर्नादेखि परीक्षाको नतिजासम्म नियमित नभएको भन्ने आरोप खेपिरहेको त्रिविले समयसीमा नै तोकेर क्यालेन्डर सार्वजनिक गरेको हो । त्रिविमा २०६२-६३ को आन्दोलनपछि शैक्षिक क्यालेन्डर नियमित हुन सकेको छैन ।
शैक्षिक क्यालेन्डरमा वार्षिक तथा सेमेस्टर प्रणाली अन्तर्गत सञ्चालन हुने स्नातक तह र सेमेस्टर प्रणाली अन्तर्गत सञ्चालन हुने स्नातकोत्तर तहको कार्यक्रम समावेश छ । त्रिविको परीक्षा सुधार तथा समन्वय परिषद्को माघ ३ मा बसेको बैठकले शैक्षिक क्यालेन्डर प्रकाशित गर्न स्वीकृति दिएको थियो । सोही आधारमा परीक्षा नियन्त्रण कार्यालयले शैक्षिक क्यालेन्डर प्रकाशित गरेको हो ।
