त्रिवि परीक्षा तालिका : स्नातक तह दोस्रो वर्षको परीक्षा तालिका सच्चिएर आयो

काठमाडौँ । त्रिभुवन विश्वविद्यालय परीक्षा नियन्त्रण कार्यालय (पनिका) ले स्नातक तह दोस्रो वर्षको परीक्षा तालिका सार्वजनिक गरेको छ। यसअघि सार्वजनिक गरेको परीक्षा तालिकामा त्रुटि भेटिएपछि पनिकाले सच्याएर तालिका पुनः सार्वजनिक गरेको हो।

यसअघि शुक्रबार सार्वजनिक गरेको सूचना अनुसार चैत २८ गतेदेखि हुने भनिएको परीक्षामा चैत ३१ गते पनि परीक्षा राखिएको थियो । जबकि चैत महिना ३० गतेसम्म मात्रै छ। त्रुटिपूर्ण तालिकाबारे विरोध सुरु भएपछि पनिकाले आफ्नो वेबसाइटबाट हटाएको थियो।

आज पुनः तालिका सच्याएर सार्वजनिक गरेको हो । यसअघि चैत ३१ गतेका लागि राखिएको माईक्रोईक्नोमिक्स फर बिजनेस विषयको परीक्षा अब २०८१ वैशाख २ गते हुनेछ। परीक्षा दिउसो १२ बजेदेखि ३ बजेसम्म हुने पनिकाले सार्वजनिक गरेको सूचनामा उल्लेख छ।

परीक्षा दिने केही विद्यार्थीको परीक्षा आवेदन फाराम छुटेको पाएकाले चैत ८ गतेभित्र भर्न समय दिएको छ। उक्त समयभित्र दोब्बर दस्तुर तिरेर सम्बन्धित क्याम्पसमार्फत परीक्षा आवेदन फाराम बुझाउनुपर्ने पनिकाले जनाएको छ।