कैलालीमा एकैदिन ८ जना पक्राउ
पढ्न लाग्ने समय :
धनगढीः कैलालीमा एकैदिन लागूऔषध र चरेशसहित ८ जना पक्राउ परेका छन्। जिल्लाका विभिन्न स्थानबाट खैरो हेरोइन र चरेशसहित उनीहरु लाई पक्राउ गरिएको जिल्ला प्रहरी कार्यालय कैलालीले जनाएको छ।
जिल्ला प्रहरी कार्यालय कैलाली र लागूऔषध नियन्त्रण ब्युरो शाखा कार्यालय धनगढीको संयुक्त टोलीले धनगढी उपमहानगरपालिका–१६ बाट १ ग्राम ६४० मिलिग्राम खैरो हेरोइन र एक थान डिजिटल काटासहित सुरेश बोहरालाई मंगलबार दिउँसो पक्राउ गरेको छ। त्यसैगरी, धनगढी उपमहानगरपालिका–१७ बाट ३१० मिलिग्राम खैरो हेरोइनसहित २५ वर्षीय सुरेश चौधरी पक्राउ परेका छन्।
यस्तै, कैलारी गाउँपालिका–७ हौसलपुरबाट २४ ग्राम ४०० मिलिग्राम खैरो हेरोइनसहित भारतको लखिमपुर खिरी बेलापर्शुवा निवासी ४७ वर्षीय हरिचन्द्र कठरिया पक्राउ परेका छन्। टीकापुर नगरपालिका–७ डाँडाबनबाट ८ ग्राम ७३० मिलिग्राम खैरो हेरोइन र ५७० मिलिग्राम चरेशसहित टीकापुर नगरपालिका–२ राजिपुरका ३३ वर्षीय सञ्जय नगार्जीसहित चार जना पक्राउ परेका छन्।
चारै जनालाई प्रहरी चौकी कालाकुण्डाबाट खटिएको टोलीले नियन्त्रणमा लिएको हो। यसैगरी, लम्कीचुहा नगरपालिका–४ भल्काबाट २ ग्राम ११० मिलिग्राम खैरो हेरोइनसहित ३१ वर्षीय गणेश थापा पक्राउ परेका छन्। उनीहरुलाई नियन्त्रणमा राखेर घटनाबारे थप अनुसन्धान भइरहेको जिल्ला प्रहरी कार्यालय कैलालीका प्रवक्ता प्रहरी नायब उपरीक्षक(डीएसपी) योगेन्द्र तिमिल्सिनाले जानकारी दिए।
