कक्षा १२ मा १ लाख ८२ हजार ९२६ विद्यार्थीको नतिजा ननग्रेडेड !
पढ्न लाग्ने समय :
काठमाडौँ । राष्ट्रिय परीक्षा बोर्डले सार्वजनिक गरेको कक्षा १२ को नतिजा अनुसार ४९.०९ प्रतिशत परीक्षार्थी ननग्रेडेड (एनजी) भएका छन् । कूल परीक्षार्थीमध्ये ४९.०९ प्रतिशत ननग्रेडेड भएको बोर्डले जानकारी दिएको छ । जसअनुसार कूल ३ लाख ७२ हजार ६३७ परीक्षार्थीमध्ये १ लाख ८२ हजार ९२६ विद्यार्थी ननग्रेडेड भएका हुन् ।
तर, गत वर्षको नतिजाको तुलनामा यस वर्ष ननग्रेडेड हुने विद्यार्थी २.८१ प्रतिशतले घटेको देखिएको छ । गतवर्ष १ लाख ८८ हजार ४१० विद्यार्थी अर्थात् ५१.९० प्रतिशत विद्यार्थीको एनजी आएको थियो ।
यस्तै यसवर्ष ६ हजार ९ सय ७६ विद्यार्थीले ३.६१ देखि ४ जिपीए ल्याउन सफल भएका छन् । यस्तै ३.२१ देखि ३.६० जिपिए ल्याउन विद्यार्थी ३८ हजार ९ सय ९९ रहेका छन् ।
गत वैशाख २६ गतेदेखि जेठ ५ गते सञ्चालित उक्त परीक्षाको नतिजा मंगलबार सार्वजनिक गरेको हो । नियमित र ग्रेडवृद्धि गरी ४ लाख ४८ हजार विद्यार्थी सहभागी रहेकोमा करिब ५१.९१ प्रतिशत मात्र ग्रेडेड (उतीर्ण) भएको र ४९.०९ प्रतिशत भने नन ग्रेडेड भएको बोर्डले जानकरी दिएको छ ।
प्रत्येक विषयको सैद्धान्तिकतर्फ न्यूनतम ३५ प्रतिशत अङ्क प्राप्त गरेमात्रै विद्यार्थीले ग्रेडसिट प्राप्त गर्ने व्यवस्था गरिएको बोर्डले जनाएको छ ।
यसरी हेर्न सकिन्छ नतिजा:
कक्षा १२ को परीक्षाफल बोर्डको आफ्नै वेबसाइड र नेपाल टेलिकमको विभिन्न प्लेटफर्मबाट थाहा पाउन सकिने व्यवस्था गरेको छ । बोर्डका अनुसार नतिजा राष्ट्रिय परीक्षा बोर्डको वेबसाइट www.neb.gov.np र नेपाल टेलिकमको वेबसाइट www.ntc.net.np मा गएर हेर्न सकिन्छ । त्यसैगरी एसएमएसबाट पनि नतिजा हेर्न सकिने छ ।
त्यसका लागि लभद लेखेर एक स्पेस दिई आफ्नो सिम्बोल नम्बर टाइप गरी १६०० नं मा र नेपाल टेलिकमको १६०१ मा एसएमएस पठाएर पनि हेर्न सकिने छ ।
