आठबीसकोट नगरपालिकाले एकै पटक २०० शिक्षक हटाउने
पढ्न लाग्ने समय :
सुर्खेत । खर्च धान्न नसकिने भन्दै आठबीसकोट नगरपालिका रुकुम पश्चिमले एकैपटक दुई सयभन्दा बढी करार शिक्षकलाई जागिरबाट हटाउने निर्णय गरेको छ ।
आन्तरिक स्रोतबाट शिक्षकलाई तलब सुविधा दिन नसकिने भन्दै पालिकाभित्रका सामुदायिक विद्यालयहरूमा कार्यरत २ सय ४६ जना करार सेवामा रहेका शिक्षकहरू हटाउने निर्णय गरिएको हो।
अब नगरपालिकामा रहेका सामुदायिक विद्यालयमा कार्यरत करार शिक्षकहरूको करार सम्झौता नवीकरण नहुने भएको छ ।
शनिवार बसेको ७८औं नगर कार्यपालिका बैठकले पालिकामा विद्यालयको संख्या धेरै भएकोले विद्यालय समायोजनमा सहज होस भन्ने उद्देश्यले करार शिक्षकको सम्झौता नवीकरण नगर्ने निर्णय गरेको नगरप्रमुख रवि केसीले बताए ।
उनकाअनुसार नगरपालिकामा कार्यरत स्वयंसेवक, पीसीएफ र करार शिक्षक हटाइएको हो। आन्तरिक आम्दानी न्यून रहेको र वित्तीय समानीकरण अनुदानबाट तलब भत्तामा गरिएको खर्च बेरुजु देखिन आएकाले शिक्षक हटाइएको हो।
अनावश्यक खर्च घटाउन चाहिने भन्दा बढी करारका कर्मचारीको साउन १ गतेदेखि म्याद नथप्ने निर्णय गरिएको केसीको भनाई छ । नगरपालिकाले करिब पाँच सय बराबर कर्मचारीलाई आन्तरिक स्रोतबाट तलब खुवाउँदै आएको छ ।
करार शिक्षक हटाएर दरबन्दी मिलान र विद्यालय गाभ्ने विषयमा छलफल सुरु भएको छ ।
