सुदूरपश्चिमले बागमतीलाई हरायो
पढ्न लाग्ने समय :
काठमाडौँ : प्रधानमन्त्री कप एकदिवसीय क्रिकेट प्रतियोगितामा सुदूरपश्चिम प्रदेशले वागमती प्रदेशलाई १६३ रनले पराजित गरेको छ ।
जनकपुरस्थित रामजानकी बहुउद्देश्यीय स्टेडियममा आइतवार भएको खेलमा २१० रनको लक्ष्य पछ्याएको बागमती ११.२ ओभरमा ४६ रनमा अलआउट भएको हो । जारी प्रतियोगितामा यो सुदूरपश्चिमको पाँचौँ जित हो ।
बागमतीका लागि शुभ कंशकारले ३२ रन बनाए । अन्य खेलाडीले दोहोरो अंक छुन सकेनन् । सुदूरपश्चिमका लागि हेमन्त धामीले ह्याट्रिकसहित ७ विकेट लिए । उनले २.४, २.५ र २.६ ओभरमा आफ्नो ह्याट्रिक विकेट लिए । हेमन्तले ६ ओभरमा १४ रन खर्चे । सो क्रममा उनले ३ मेडेन ओभर पनि फाले । शेर मल्लले ३ विकेट लिए ।
पहिले ब्याटिङ गरेको सुदूरपश्चिम ४२.१ ओभरमा २०९ रनमा अलआउट भयो ।
सुदूरपश्चिमका लागि नारायण जोशीले अर्धशतकीय पारी खेले । उनले ६८ बलमा २ चौका र ६ छक्का प्रहार गर्दै ७५ रन बनाए ।
दिपक बोहराले ४०, अभिषेक पालले ३९ र अशोक धामीले १७ रन बनाए । अन्य खेलाडीले दोहोरो अंक छुन सकेनन् ।
वागमतीका लागि सन्दीप लामिछाने र प्रतिस जिसीले ४–४ विकेट लिए । सोनु देवकोटा र रिजन ढकालले १–१ विकेट लिए ।
