मोटरसाइकल दुर्घटना हुँदा एक जनाको मृत्यु
पढ्न लाग्ने समय :
सिन्धुपाल्चोक । सिन्धुपाल्चोकको बनदेउ चौतारा सडकको जल्केनीमा मोटसाइकल दुर्घटना हुँदा एक जनाको ज्यान गएको छ।
विपरीत दिशाबाट आइरहेको मोटरसाइकल र टिपर एकआपसमा अनियन्त्रित भई मोटरसाइकल पल्टिँदा एक जनाको मृत्यु भएको हो।
बनदेउबाट चौतारातर्फ जाँदै गरेको प्रदेश ३–०२–००६ प ९५३ नम्बरको मोटरसाइकल र विपरीत दिशाबाट आउँदै गरेको बाप्र ०१–००६ ख २७१६ नम्बरको टिपर जल्केनी मोडमा भेट हुँदा मोटरसाइकल अनियन्त्रित भइ दुर्घटना भएको प्रहरीले जनाएको छ।
मृत्यु हुनेमा चौतारा साँगाचोकगढी नगरपालिका(७ की इन्दिरा अधिकारी रहेकी छन्। उनी श्रीमान् सन्तोष दुलालले चलाएको मोटरसाइकलको पछाडि सवार थिइन्।
अधिकारीलाई उपचारका लागि चौतारा अस्पताल लगिएको र अस्पतालले उनलाई मृत घोषणा गरेको जिल्ला प्रहरी कार्यालय सिन्धुपाल्चोकले जनाएको छ। मोटरसाइकल चालक सन्तोष घाइते छन्।
टिपर चालक चौतारा साँगाचोकगढी नगरपालिका(११ का मनोहरी गिरीलाई प्रहरीले नियन्त्रणमा लिएर थप अनुसन्धान भइरहेको प्रहरीले जनाएको छ।
