मधेस प्रदेशका मुख्यमन्त्री सिंहद्वारा पदबाट राजिनामा
पढ्न लाग्ने समय :
न्युज नेपाल समाचार
धनगढी, भदौ २४ गते ।
मधेस प्रदेशका मुख्यमन्त्री सतिशकुमार सिंहले पदबाट राजिनामा दिनुभएको छ । सोमबारदेखि जारी जेनजी पुस्ताको आन्दोलनका क्रममा ठूलो संख्यामा प्रदर्शनकारीको मृत्यु र सयौ घाइते भएको प्रति पीडा व्यक्त गर्दै उहाँले मंगलबार दिउँसो राजिनामा दिनुभएको छ ।
राजिनामा दिने क्रममा उहाँद्वारा जारी विज्ञप्तीमा भनिएको छ– देशभर जेनजी पुस्ताले गरेको प्रदर्शनका क्रममा ज्यान जानु आफ्ना लागि असह्य पीडा र गहिरो दुःखको विषय बनेको छ । दिवंगत आत्माहरुप्रति हार्दिक श्रद्धाञ्जली अर्पण गर्दै, घाइतेहरुको शीघ्र स्वास्थ्य लाभको कामना गर्दछु । उहाले– जनताको विश्वास र मतबाट निर्वाचित भएर जनप्रतिनिधि बन्नु मेरा लागि जीवनकै ठूलो गौरव भए पनि नागरिककै जीवन सुरक्षित गर्न नसकिएको वर्तमान परिस्थितिले आफूलाई आत्मसम्मानपूर्वक यो निर्णय लिन बाध्य बनाएको उल्लेख गर्नुभएको छ । उहाले भन्नुभएको छ– नागरिकको ज्यान भन्दा ठूलो अरु केही छैन भन्ने अटल विश्वासका साथ, जनताको अधिकार र भविष्यप्रति उत्तरदायी हुँदै म मधेश प्रदेशको मुख्यमन्त्री पदबाट राजीनामा गर्दछु ।
मुख्यमन्त्री सिंहले संविधानले प्रत्येक नागरिकलाई प्रदान गरेको शान्तिपूर्ण आन्दोलनको अधिकारलाई सम्मान गर्दै, समस्या समाधानको एक मात्र बाटो संवाद, आपसी समझदारी र सहकार्य हो भन्ने आफ्नो दृढ विश्वास कायम रहेको बताउनुभएको छ । वक्तव्यमा भनिएको छ– म मुख्यमन्त्री रहँदा प्रत्यक्ष वा अप्रत्यक्ष रुपमा सहयोग र साथ दिनु हुने सम्पूर्णमा हृदयदेखि आभार व्यक्त गर्दछु । साथै यो महत्वपूर्ण जिम्मेवारी बहन गर्ने अवसर प्रदान गर्नु भएकामा जनमत पार्टीका श्रदेय राष्ट्रिय अध्यक्ष माननीय डा. सिके राउतज्यू सहित पार्टीका सबै समिति, नेता, कार्यकर्ताहरुप्रति कृतज्ञता प्रकट गर्दछु ।
जनमत पार्टीका अध्यक्ष डा. सिके रावतको निर्देशनमा उहाँले आफ्नो पदबाट राजिनामा दिएको बताइएको छ ।
