बाजुरामा जीप दुर्घटना हुँदा दुईजनाको मृत्यु, सात घाइते
पढ्न लाग्ने समय :
काठमाडौं : बाजुराको हिमाली गाउँपालिका–५, क्युडीस्थित कुवाडी-क्युडी भित्री कच्ची सडकखण्डमा यात्रुवाहक जीप दुर्घटना हुँदा दुईजनाको मृत्यु भएको छ । दुर्घटनामा चालकसहित सातजना घाइते भएका छन् ।
धुलाचौरबाट दुधिला खोलातर्फ जाँदै गरेको सुप्रप्र ०१-००१ ज १४७८ नम्बरको जीप सोमबार सडकको माथिल्लो मोडबाट करिब १० मिटर तल खस्दा दुर्घटना भएको हो ।
दुर्घटनामा हिमाली गाउँपालिका–२ बस्ने ४० वर्षीय धर्मलाल बुढा र हुम्लाको ताजाकोट गाउँपालिका-५ का अन्दाजी ४० वर्षीय अम्मरसिंह बुढाको उपचारका क्रममा मृत्यु भएको प्रहरीले जनाएको छ ।
दुर्घटनामा चालक बाजुराको हिमाली गाउँपालिका-२, नातीखोला बस्ने २५ वर्षीय जनविर बुढा, सोहीका ३१ वर्षीय मिजरा बुढा, हुम्लाको ताजाकोट गाउँपालिका–५ बस्ने २० वर्षीया अस्मिता थापा, सोहीका २८ वर्षीया जंगसिंह बुढा, २० वर्षीय गोरख रोकाया, २७ वषीय लोकेन्द्र बुढा, ९ वर्षीया सुस्मा बुढा घाइते छन् । दुर्घटनामा परेर घाइते भएकाहरूको कोल्टी आधारभूत अस्पतालमा उपचार भइरहेको छ ।
