दार्चुलाको चमेलिया जलविद्युत आयोजना निर्माण प्रक्रिया अघि बढ्यो
पढ्न लाग्ने समय :
सुदूरपश्चिम प्रदेशको दार्चुलाको चमेलिया नदीमा मध्य चमेलिया जलविद्युत आयोजना निर्माण प्रक्रिया अघि बढाइएको छ । दार्चुला पावर कम्पनी प्रवद्र्धन रहेको २८ दशमलव ३० मेगावाट क्षमताको मध्य चमेलिया जलविद्युत आयोजना निर्माण हुने जनाइएको छ ।
सो आयोजना मार्मा गाउँपालिकामा निर्माण हुने छ । सो आयोजनालाई विद्युत विकास विभागले २०८१ साल चैत १३ गते विद्युत उत्पादन अनुमति पत्र प्रदान गरेको थियो । आयोजनाको पूरक वातावरणीय प्रभाव मूल्यांकनका लागि प्रस्ताव भए बमोजिम कृषि, वन तथा पर्यावरण मन्त्रालयले सोमबार सार्वजनिक सूचना सार्वजनिक गरेको छ । यसअघि २०८० साल चैत ७ गते आयोजनाको वातावरणीय प्रभाव मूल्यांकन प्रतिवेदन तत्कालीन वन तथा वातावरण मन्त्रालयले स्वीकृत गरेको थियो ।
नेपाल विद्युत प्राधिकरण र चमेलिया पावर लिमिटेडबीच २०८० साल असोज २९ गते विद्युत खरिद बिक्री सम्झौता समेत भइसकेको जनाइएको छ । भने २०८२ साल जेठ २१ गते आयोजानको वित्तीय व्यवस्थापन समेत भइसकेको छ । आयोजनाको माथिल्लो तटमा ४० मेगावाट क्षमताको माथिल्लो चमेलिया जलविद्युत आयोजना र तल्लो तटमा ३० मेगावाट क्षमताको चमेलिया खोला जलविद्युत आयोजना रहेका छन्
