दाङमा एलपी ग्यास आपूर्तिमा समस्या, अत्यावश्यक बाहेक जिल्ला बाहिर लैजान प्रशासनको रोक
पढ्न लाग्ने समय :
दाङ जिल्लामा खाना पकाउने एलपी ग्यासको आपूर्तिमा देखिएको समस्यालाई मध्यनजर गर्दै जिल्ला प्रशासन कार्यालय दाङले अत्यावश्यक प्रयोजनबाहेक ग्यास जिल्ला बाहिर लैजान रोक लगाएको छ।
जिल्ला प्रशासन कार्यालयले शुक्रबार सूचना जारी गर्दै जिल्लामा एलपी ग्यासको सहज आपूर्ति कायम राख्न तथा सर्वसाधारण उपभोक्तालाई सहज रूपमा ग्यास उपलब्ध गराउने उद्देश्यले यस्तो निर्णय गरिएको जनाएको हो।
सूचनाअनुसार अत्यावश्यक प्रयोजनबाहेक दाङबाट अन्य जिल्लातर्फ एलपी ग्यास सिलिन्डर लैजाने वा ओसारपसार गर्ने कार्यमा रोक लगाइएको छ। प्रशासनले उक्त निर्देशनको उल्लङ्घन गरे प्रचलित कानुनअनुसार कारबाही गरिने चेतावनी पनि दिएको छ।
प्रशासनले सबै सम्बन्धित पक्षलाई सूचनाको पालना गर्न आग्रह गर्दै जिल्लावासीलाई आवश्यक परे जिल्ला प्रशासन कार्यालयसँग सम्पर्क गर्न अनुरोध गरेको छ।
