जेनजी आन्दोलनमा ज्यान गुमाएकाहरुको अन्त्येष्टि मन्त्रीद्वय घिसिङ र अर्याल शवयात्रामा सहभागी ।
पढ्न लाग्ने समय :
न्युज नेपाल समाचार
काठमाडौं, भदौ ३१ गते । जेनजी आन्दोलनका क्रममा ज्यान गुमाएकाहरूको मंगलबार अन्तिम दाहसंस्कार गरिएको छ । अन्त्येष्टिअघि ज्यान गुमाएकाहरुका परिवार सदस्य, आफन्त तथा सर्वसाधारणले शवयात्रा निकालेका छन् ।
जेनजी आन्दोलनका क्रममा मृत्युवरण गरेकाहरुको अन्तिम दाहसंस्कारअघि निकालिएको शवयात्रामा उर्जामन्त्री कुलमान घिसिङ र गृहमन्त्री ओमप्रकाश अर्याल सहभागी भएका छन् ।
मंगलबार शिक्षण अस्पतालबाट निकालिएको शवयात्रामा ऊर्जामन्त्री घिसिङ गोपीकृष्णहलबाट र गृहमन्त्री अर्याल चाबहिल चोकबाट शवयात्रामा सहभागी भएका हुन् । शवयात्राका क्रममा मन्त्री कुलमानले राष्ट्रिय झण्डा बोकेका थिए भने गृहमन्त्री अर्यालले राष्ट्रिय झण्डा ओढेका थिए ।
त्रिवि शिक्षण अस्पतालबाट शवयात्रा चक्रपथ हुँदै पशुपति आर्यघाट लगिएको छ । शवयात्रामा सहभागीहरुले मृतकका तस्वीर र राष्ट्रिय झण्डा बोकेका छन् ।
सरकारले जेनजी आन्दोलनमा मृत्यु भएकाहरुलाई शहीद घोषणा गर्नुका साथै राष्ट्रिय सम्मानसहित अन्त्येष्टि गर्ने र राष्ट्रिय शोक स्वरुप असोज १ गते सार्वजनिक बिदा दिने लगायतका निर्णय गरिसकेको छ ।
भ्रष्टाचार, अव्यवस्था र सामाजिक सञ्जाल प्रतिबन्धविरुद्ध युवाहरूले गरेको प्रदर्शन हिंसात्मक बनेपछि ७२ जनाको मृत्यु भएको छ । धेरैजसोको गोली लागेर मृत्यु भएको छ । कतिपयका शव आगोमा जलेको अवस्थामा भेटिएका थिए ।
