एनएसजेएफ अग्रज पत्रकारिता पुरस्कारबाट भण्डारी र युवाबाट सापकोटा सम्मानित
पढ्न लाग्ने समय :
नेपाल खेलकुद पत्रकार मञ्च (एनएसजेफ) ले यस वर्षको एनएसजेएफ अग्रज पत्रकारिता अवार्डबाट वरिष्ठ पत्रकार श्रीविक्रम भण्डारी र सुमन भोम्जन स्मृति युवा खेल पत्रकारिता पुरस्कारबाट विनयज्योति सापकोटालाई सम्मान गरेको छ । मञ्चले आफ्नो २९ औं स्थापना दिवसको अवसरमा सोमवार ललितपुरमा आयोजित कार्यक्रममा अग्रज पत्रकार भण्डारी र अनुज पत्रकार सापकोटालाई सम्मान गरेको हो । भण्डारी मेरो खेल डटकमका सम्पादक हुन् । सापकोटा भने कान्तिपुर टेलिभिजनमा कार्यरत छन् । अग्रजलाई सम्मान र युवालाई प्रोत्साहन भन्ने नाराका साथ विगत १० वर्षदेखि यो अवार्ड आयोजना गर्दै आएको छ । युवा तथा खेलकुदमन्त्री तेजुलाल चौधरी, राष्ट्रिय खेलकुद परिषद् (राखेप) का सदस्यसचिव टंकलाल घिसिङ, वागमती प्रदेश खेलकुद परिषदका सदस्य रवि महर्जन, एनएसजेएफका कार्यवहाक अध्यक्ष निरञ्जन अधिकारी र महासचिव प्रज्वल ओलीले वरिष्ठ पत्रकार भण्डारीलाई २५ हजार नगद, ताम्रपत्र र दोसल्ला ओढाएर सम्मान गरे ।
सुदूरपश्चिमको डडेलधुरामा जन्मिएका भण्डारीले २०४४ सालदेखि खेलकुद पत्रकारिता गर्दै आएका छन् । २०४४ सालमा हुवाहुरीका कारण दशरथ रंगशालामा ९० जनाभन्दा बढी मानिसको ज्यान गएको समयमा रिपोर्टिङ गर्दै भण्डारीले आफ्नो करियर शुरु गरेका थिए । खेलकुदमन्त्री चौधरीले युवा पत्रकार सापकोटालाई भने ल्यापटप र ताम्रपत्र प्रदान गर्दै सम्मान गरे । सापकोटा पछिल्ला ६ वर्षयता खेलकुद पत्रकारितामा सक्रिय छन् । सम्मान कार्यक्रममा भण्डारीले तीन दशकअगाडि आफूहरूले स्थापना गरेको संस्थाबाट सम्मानित हुन पाउँदा धेरै खुशी लागेको बताए । अन्तर्राष्ट्रिय समन्वयका साथै विभिन्न गतिविधिहरूमार्पmत मन्च नयाँ उचाईमा पुग्दा आफूलाई धेरै खुशी लागेको उनले प्रतिक्रिया दिए ।
युवा पत्रकारिता पुरस्कार प्राप्त गरेका सापकोटाले एनएसजेएफद्वारा प्रदान गरिँदै आएको यो अवार्ड एकदिन आफूले पनि हासिल गर्ने लक्ष्य लिएको र आज यो प्राप्त गर्दा खेलकुद पत्रकारितामा प्रोत्साहन मिलेको धारणाा राखे । युवा तथा खेलकुदमन्त्री चौधरीले सम्मानित पत्रकारद्वयलाई बधाई दिँदै नेपाली खेलकुद क्षेत्रले प्रतीक्षा गरिरहेको दशौं राष्ट्रिय खेलकुद निर्धारित मितिमा नै आयोजना गर्ने प्रयास भइरहेको बताए । उनले समयमा नै खेल आयोजना गर्न हरेक दिन काम भैरहेको दाबी गरेका छन् ।
राखेप सदस्यसचिव टंकलाल घिसिङले नेपाली खेलकुद विकासमा खेलकुद पत्रकारको भुमिका विशेष रहेको उल्लेख गर्दै आज खेलकुद पत्रकार सम्मानित भइरहँदा समग्र नेपाली खेल क्षेत्र नै सम्मानित भएको महशुस गरेको बताए । खेलाडी, खेलकुद पत्रकार र नेपाली खेलकुदको नियमन निकायहरू सबै एउटै उद्देश्य खेलकुद विकासका लागि काम गर्दै आएकाले यसै क्षेत्रमा काम गर्ने सदस्य सम्मानित हुँदा समग्री खेलकुद नै सम्मानित भएको महशुस भइरहेको बताए ।
एनएसजेएफका कार्यवहाक अध्यक्ष निरञ्जन अधिकारीले सम्मानित भएका अग्रज पत्रकार भण्डारी र अनुज पत्रकार सापकोटालाई बधाई दिँदै खेलकुद पत्रकारिताको व्यावसायिक स्तरोन्नतीका लागि गरिने विभिन्न किसिमको प्रशिक्षण कार्यक्रम सहयोग गरिदिन आग्रह गरे । मञ्चका महासचिव ओलीले यस अवार्डका वर्षभर मञ्चले आयोजना गर्ने विभिन्न कार्यक्रमबारे प्रकाश पार्दै राष्ट्रिय खेलकुद परिषद्मा एक समूहले गरेको तोडफोड घटनाबारे पनि निन्दा पनि गरेका थिए ।
