बाजुरामा ढुङ्गा प्रहार गरेर युवकको हत्या
पढ्न लाग्ने समय :
धनगढी : बाजुरामा एक जनाको हत्या भएको छ । जिल्लाको बुढीनन्दा नगरपालिका–६ कोटिला बस्ने ३२ वर्षीय निर रावतको बुधवार राति हत्या गरिएको प्रहरीले जनाएको छ ।
जिल्ला प्रहरी कार्यालयका प्रहरी निरीक्षक नरेश बहादुर शाहीले आपसी विवादका क्रममा रावतको हत्या भएको पाइएको बताए । उनकाअनुसार हत्यामा संलग्न रहेको आरोपमा १९ वर्षीय टेकेन्द्र रावतलाई पक्राउ गरिएको छ ।
उनलाई इलाका प्रहरी कार्यालय बुढीनन्दाको टोलीले राति नै पक्राउ गरेको हो । अहिले जिप्रकाबाट प्रहरी निरीक्षक शाही नेतृत्वको टोली घटनास्थलतर्फ गइरहेको छ । प्रारम्भिक अनुसन्धानका क्रममा आपसी विवादका क्रममा टेकेन्द्रले निरलाई ढुङ्गा प्रहार गरेको पाइएको प्रहरीको भनाइ छ ।
मृतकको शव घटनास्थलमै रहेको छ । घटनाबारे थप अनुसन्धान भइरहेको प्रहरीले जनाएको छ ।
