म जितकाे नजिक छु: ढुङ्गाना
पढ्न लाग्ने समय :
धनगढी: नेपाल कम्युनिष्ट पार्टी (एमाले)का कैलाली क्षेत्र नम्बर ५ का प्रतिनिधि सभा सदस्य उम्मेदवार यज्ञराज ढुङ्गानाले आफू निर्वाचनमा जितको निकै नजिक पुगेको दाबी गरेका छन्। प्रेस चौतारी नेपालद्वारा आयोजित “प्रेस चौतारीसँग उम्मेदवार” कार्यक्रममा बोल्दै उनले पार्टी संगठन, कार्यकर्ता तथा आम नागरिकबाट उत्साहजनक समर्थन प्राप्त भइरहेको बताए।
ढुङ्गानाले आफूलाई पार्टीले युवा उम्मेदवारका रूपमा अघि सारेको उल्लेख गर्दै त्यसले ऊर्जा, नवीन सोच र परिणाममुखी कार्यशैलीलाई प्रतिनिधित्व गर्ने विश्वास व्यक्त गरे। “युवा उम्मेदवार भएकै कारण म जनताको अपेक्षा र चाहनालाई नजिकबाट बुझ्न सक्षम छु,” उनले भने। उनका अनुसार पार्टीका विभिन्न तहका संगठनहरू सक्रिय रूपमा परिचालन भएका छन् र घरदैलो अभियानका क्रममा नागरिकबाट सकारात्मक प्रतिक्रिया प्राप्त भइरहेको छ।
उनले भ्रमपूर्ण प्रचारप्रसार नगर्ने स्पष्ट पार्दै कार्यान्वयन गर्न सकिने एजेण्डा लिएर चुनावी मैदानमा उत्रिएको बताए। “जनतालाई भ्रममा राखेर मत माग्ने मेरो उद्देश्य होइन,” उनले भने, “म गर्न सकिने योजना र स्पष्ट प्रतिबद्धता बोकेर आएको छु।” ढुङ्गानाले विकासका नाममा असम्भव आश्वासन दिने प्रवृत्तिको अन्त्य हुनुपर्नेमा जोड दिए।
उनको प्रमुख योजनामध्ये सहिद दशरथचन्द विश्वविद्यालयमा स्वास्थ्य शिक्षण कार्यक्रम सञ्चालन गर्ने पहल रहेको छ। सुदूरपश्चिम प्रदेशमै गुणस्तरीय स्वास्थ्य शिक्षा विस्तार गर्न सके स्थानीय विद्यार्थीलाई अवसर मिल्ने र क्षेत्रको स्वास्थ्य सेवा प्रणाली सुदृढ हुने उनले बताए। “उच्च शिक्षा र स्वास्थ्य क्षेत्रको विकास बिना समग्र समृद्धि सम्भव छैन,” उनले भने।
ढुङ्गानाले मतदाताका आधारभूत आवश्यकता अझै पूर्णरूपमा सम्बोधन नभएको स्वीकार गर्दै सडक, खानेपानी, रोजगारी र गुणस्तरीय शिक्षा जस्ता विषयमा दीर्घकालीन समाधान आवश्यक रहेको बताए। उनका अनुसार जनताले अब केवल नारामात्र होइन, सुशासन र पारदर्शिता चाहेका छन्। “जनता भ्रष्टाचारमुक्त समाज खोजिरहेका छन्,” उनले जोड दिए।
उनले आफू कुनै पनि प्रकारको अनियमिततामा संलग्न नहुने प्रतिबद्धता व्यक्त गरे। “जुन दिन म अनियमिततामा संलग्न हुन्छु, त्यही दिन राजीनामा दिन तयार छु,” उनले स्पष्ट रूपमा भने। सार्वजनिक पदलाई जिम्मेवारी र विश्वासको विषयका रूपमा लिँदै उनले जवाफदेहिता कायम राख्ने वाचा गरे।
विगतमा निर्वाचित प्रतिनिधिहरूले जनअपेक्षा पूरा गर्न नसकेको गुनासो जनताबाट आएको उल्लेख गर्दै ढुङ्गानाले आफू फरक शैलीमा काम गर्ने बताए। “मैले आफ्ना योजना सार्वजनिक गरिसकेको छु। आश्वासन होइन, गरेर देखाउने मेरो प्रतिबद्धता हो,” उनले भने। विकास योजनालाई प्राथमिकता निर्धारण गरी चरणबद्ध रूपमा कार्यान्वयन गरिने उनको भनाइ छ।
चुनावी प्रतिस्पर्धाबारे बोल्दै उनले आफ्नो मुख्य प्रतिस्पर्धा नेपाली काँग्रेससँग रहेको बताए। यद्यपि उनले वास्तविक धरातलभन्दा बाहिर गएर हल्लाको भरमा मतदाता प्रभावित गर्ने प्रयास भइरहेको आरोप लगाए। “हाउगुजीको भरमा आकर्षित गर्ने प्रयास भइरहेको छ, तर जनताले यथार्थ बुझिसकेका छन्,” उनले भने।
ढुङ्गानाले आफू बलियो अवस्थामा रहेको दाबी गर्दै अन्तिम नतिजा आफ्नो पक्षमा आउने विश्वास व्यक्त गरे। “म जितको निकै नजिक छु,” उनले पुनः दोहोर्याए। उनका अनुसार चुनाव केवल दलबीचको प्रतिस्पर्धा नभई विकासको दृष्टिकोण र कार्यशैलीबीचको प्रतिस्पर्धा पनि हो।
उनले मतदातालाई भावनामा होइन, काम गर्ने क्षमता र स्पष्ट योजनाका आधारमा निर्णय गर्न आग्रह गरे। “कैलाली क्षेत्र नम्बर ५ को समग्र विकासका लागि दीर्घकालीन सोच, इमान्दार नेतृत्व र जवाफदेही प्रतिनिधित्व आवश्यक छ,” उनले भने। आफूले यही मार्ग अपनाउने प्रतिबद्धता व्यक्त गर्दै उनले मतदाताको साथ र विश्वास कायम रहने आशा व्यक्त गरे।
उनले पार्टीभित्र कुनै विवाद नरहेकाे बताउँदै – याे विपक्षीले फैलाएकाे हल्ला हाे ।
