सुदूरपश्चिममा एमाले र नेकपाले टुङ्ग्याए उम्मेदवार
पढ्न लाग्ने समय :
महेन्द्रनगरः आगामी फागुन २१ गते हुने प्रतिनिधिसभा सदस्य निर्वाचनमा सुदूरपश्चिम प्रदेशबाट नेपाल कम्युनिष्ट पार्टी एमाले र नेपाली कम्युनिष्ट पार्टीले उम्मेदवारको टुङ्गो लगाएका छन्।
सुदूरपश्चिमका नौ जिल्लामध्ये कैलालीमा ५, कञ्चनपुरमा ३, अछाममा २ अन्यमा एक/एक गरी १६ वटा निर्वाचन क्षेत्र कायम छन्। नेकपा एमाले र नेपाली कम्युनिष्ट पार्टीले टुङ्ग्याएका उम्मेदवारमा १२ जना सङ्घीय र प्रदेशका पूर्वमन्त्री हुन्।
नेपाली कम्युनिष्ट पार्टीबाट अछाम क्षेत्र नं. १ बाट भीमबहादुर रावल, सोही दलका कैलाली क्षेत्र नं. ५ मा प्रेम आले, कञ्चनपुर क्षेत्र नं. १ मा विना मगर तथा त्रिलोचन भट्टलाई डोटीबाट उम्मेदवार बनाइएको छ।
प्रदेशका पूर्वमन्त्री प्रकाशबहादुर शाह बाजुराबाट, नेपाली कम्युनिष्ट पार्टीबाट कञ्चनपुर २ मा लालबहादुर खड्का कञ्चनपुर– ३ मा मानबहादुर सुनार उम्मेदवार हुने भएको छ।
एमालेका अनुसार कैलाली–१ बाट द्वारिका न्यौपाने, कैलाली–२ बाट सूर्यबहादुर थापा, कैलाली–३ बाट गौरीशंकर चौधरी, कैलाली–४ बाट लेखराज भट्ट र कैलाली–५ बाट यज्ञराज ढुङ्गाना उम्मेदवार बनेका छन्।
कञ्चनपुर जिल्लाको क्षेत्र नाबर –१ बाट कमला बोहरा, क्षेत्र नम्बर २ बाट वचनबहादुर सिंह र क्षेत्र नम्बर ३ बाट दीपक भट्टलाई एमालेले उम्मेदवार बनाएको छ। प्रदेश सभा सदस्य धर्मराज पाठकले सामाजिक सञ्जालमा राखेको विवरणमा अछाम १ बाट झपटबहादुर बोहरा र २ बाट यज्ञ बोगटी उम्मेदवार बनेका छन्।
बाजुराबाट लालबहादुर थापा, डोटीबाट दीपक धामी, डडेल्धुराबाट चक्र स्नेही र बझाङबाट अफिलाल ओखेडाको उम्मेदवार बन्ने भएका छन्। बैतडी जिल्लाबाट दामोदर भण्डारी र दार्चुलाबाट गणेशसिंह ठगुन्नालाई एमालेले टिकट दिने भएको छ।
