सशस्त्र प्रहरीको पूर्व–पश्चिम झण्डा मार्च कैलालीमा
पढ्न लाग्ने समय :
धनगढी : सशस्त्र प्रहरीको पूर्व–पश्चिम झण्डा मार्च कैलालीमा प्रवेश गरेको छ। पश्चिमबाट पूर्व तर्फ हिडेको झण्डा मार्च कैलाली जिल्लामा प्रवेश गरेको हो।
सशस्त्र प्रहरीको रजत महोत्सवको अवसरमा झण्डा मार्चको आयोजना गरिएको सशस्त्र प्रहरीले बताएको छ। सशस्त्र प्रहरी, कञ्चनपुरले मङ्गलवार कैलालीलाई झण्डा हस्तान्तरण गरेको हो। कञ्चनपुरको डोकेबजारमा आयोजना गरिएको कार्यक्रममा कैलाली जिल्लालाइ झण्डा हस्तान्तरण गरिएको छ। कैलालीको सीमा क्षेत्रमा सशस्त्र प्रहरीले झण्डा मार्च गर्ने छ।
सशस्त्र प्रहरी बल नेपालको २५औँ सशस्त्र प्रहरी दिवसका अवसरमा कञ्चनपुरको पश्चिमी नाका गड्डाचौकीबाट पूर्व–पश्चिम झण्डा मार्च सुरु भएको थियो। रजत जयन्तीका अवसरमा पश्चिमी नाका गड्डाचौकीबाट राष्ट्रिय एकता, देशभक्ति र सुरक्षा चेतना अभिवृद्धि गर्ने उद्देश्यसहित सशस्त्र प्रहरी बलले झण्डा मार्च सुरु गरिएको हो।
सशस्त्र प्रहरी बल नेपालले शान्ति, सुरक्षा र विपद् व्यवस्थापनमा पु¥याउँदै आएको योगदानलाई स्मरण गराउँदै आगामी दिनमा अझ प्रभावकारी भूमिका निर्वाह गर्ने प्रतिबद्धता व्यक्त गरेको छ। सङ्गठनभित्रको समन्वय, टोलीको भावना सुदृढ गर्ने, सीमा क्षेत्रका नागरिक, स्थानीय तह तथा सरोकारवाला निकायसँग जनसम्पर्क अभिवृद्धि गर्न सशस्त्र प्रहरीले मार्चपास आयोजना गरेको जनाएको छ।
