पार्टी पुनरगठनका लागि पदत्याग गर्ने काँग्रेस महामन्त्री थापाको घोषणा
पढ्न लाग्ने समय :
- समयमा निर्वाचन गरेर संविधान र लोकतन्त्र जोगाउनु पर्छ
- जेनजी आन्दोलनले उठाएको भ्रष्टाचारमुक्त राज्य र समाजको नेतृत्व गर्ने पार्टी बनाऔं
- गल्ती भएको छ, आत्मसमिक्षा, आत्ममूल्यांकन र आत्मसंकल्प गरौ
न्युज नेपाल समाचार
काठमाडौं, भदौ ३० गते । नेपाली काँग्रेसका महामन्त्री गगन थापाले पार्टी पुनर्गठनका क्रममा आफू महामन्त्री पद त्याग्न तयार रहेको घोषणा गरेका छन् । सोमबार सामाजिक सञ्जालमार्फत महामन्त्रीले भनेका छन्– यसको लागि म सहर्ष महामन्त्री पद छोड्न तयार छु । यसमा छलफल शुरू गरौं । स्वीकार गरौं । गल्ती भएको छ, अनि आत्मसमीक्षा, आत्ममुल्यांकन र आत्मसंकल्प गरौं ।
महामन्त्री गगन थापाले निष्पक्ष निर्वाचन सम्पन्न गरेर संविधान र लोकतन्त्रलाई जोगाउनुपर्ने आग्रह समेत गरेका छन् । तोकिएकै समयमा निर्वाचन गराउने वातावरण निर्माण गरिनुपर्ने महामन्त्री थापाको भनाई छ । सामाजिक सञ्जालमा उनले लेखेका छन्– भयरहित वातावरणमा समयमै निष्पक्ष निर्वाचन सम्पन्न गरेर संविधान र लोकतन्त्रलाई सही ट्रयाकमा ल्याउने अहिलेको मुख्य राष्ट्रिय जिम्मेवारी बन्न पुगेको छ ।
उनले निर्वाचनको तयारी सँगसँगै पार्टी पुनर्गठन गर्नुपर्ने पनि औल्याएका छन् । उनले पार्टी पुनर्गठन अनिवार्य आवश्यकता भएको उल्लेख गर्दै भनेका छन्– संविधान दिवसकै दिनदेखि संकल्पसहित पुनर्गठन अभियान सुरु गरौं ।
महामन्त्री थापाले जेनजी आन्दोलनले उठाएको भ्रष्टाचारमुक्त राज्य र समाजको नेतृत्व गर्ने पार्टी बनाउने गरी पार्टीको सदस्यता, संगठन संरचना, नेतृत्व चयन प्रक्रियादेखि सबै मुद्दा र शैलीमा आमूल सुधार जरूरी रहेको पनि औल्याएका छन् ।
