अर्थमन्त्रीको सपथ ग्रहणमा शालिकराम जंगिएपछि….
पढ्न लाग्ने समय :
न्युज नेपाल समाचार
काठमाडौं, भदौ ३० गते ।
नवनियुक्त अर्थमन्त्री रामेश्वर प्रसाद खनालले सोमबार पदभार गर्ने क्रममा अर्थ मन्त्रालयमा केहीबेर हंगामा भएको छ ।
पदभार ग्रहणसँगै मन्त्रालयका सचिव घनश्याम उपाध्याय, सहसचिवहरु तथा उच्चपदस्थ कर्मचारीसँग परिचयात्मक कार्यक्रममा अचानक पर्वतका शालिकराम पौडेल जंगिएका थिए । परिचयात्मक कार्यक्रममा मन्त्री खनालले आफ्ना धारणा व्यक्त गरिरहँदा सुनेर बसेका शालिकरामले मन्त्रीको कुरा सकिएपछि मन्त्री नजिकै आएर आफ्नो आक्रोस पोखे ।
उनले मन्त्रीसँग प्रशन गर्दै भने– यो अर्थ मन्त्रालयबाट अहिलेको बजेट ल्याउँदा उहा (घनश्याम उपाध्याय) नै अर्थसचिव हो नि । यो देशमा ७७ जिल्ला छन् कि ७ वटा जिल्ला छन् ? तपाईं यही अर्थमा बसेर ७ वटा जिल्लाको मात्रै बजेट ल्याएको मान्छेले अहिले यो बजेट कसरी टिकायो ?
शालिकराम धाराप्रवाह बोलिरहँदा सुरक्षाकर्मीले रोक्न खोजेका थिए । अर्थमन्त्रीले शालिकरामलाई त्यसबारे अहिले नै निर्णय भइसकेको बताए । उनले आजै आफूले गरेको निर्णयको आशय त्यही भएको भन्दै सम्झाउने प्रयास गरेका थिए ।
शालिकरामलाई सुरक्षाकर्मीले बाहिर लग्न खोजेपछि उनले फेरि भने– सुन्नुस्, हाम्रो पनि कुरा छन् यहाँ । हामीले पनि आन्दोलन गरेका हौं । हामी त्यसै आएका हौं र ? तपाईं त्यसै मन्त्री भएको हो र ? सुरक्षाकर्मीले थप रोक्न खोज्दै गर्दा उनले अर्थमन्त्रीलाई भने– पहिला उहाँ (अर्थसचिव उपाध्याय) लाई फेर्नुपर्छ, कहिले फेर्ने हो, फेर्नुस् ।
सोमबार मध्यान्ह पद तथा गोपनियातको सपथ ग्रहण गरेका अर्थमन्त्री खनालले पदभार ग्रहण गरेपछि पहिलो निर्णय नै पूर्वतयारी नभएका र टुक्रे योजना कार्यान्वयन नगर्ने, राजनीतिक दबाबका आधारमा अघि बढेका आयोजना कटौती गर्ने लगायतका निर्णय गरेका छन् ।
