सुदूरपश्चिमका सीमानाकामा कडाई
पढ्न लाग्ने समय :
न्युज नेपाल समाचार
धनगढी, भदौ २५ गते ।
नेपालको राजनीतिक अवस्था अनिश्चित भएसँगै भारतसँग जोडिएका सुदूरपश्चिम प्रदेशका सीमा नाकाहरुमा चेकजाँचमा कडाइ गरिएको छ । जेनजी आन्दोलनका क्रममा प्रधानमन्त्रीले राजिनामा दिनुका साथै देशभर व्यापक हिंसा, तोडफोड र आगजनी, लुटपाट र आगजनीका घटनाहरुमा बृद्धि भएका छन् ।
प्रशासनले सीमानाकाबाट हुनसक्ने सम्भाव्य अबाञ्छित र अपराधिक गतिविधि नियन्त्रण गर्न चेकजाँचमा कडाई गरेको छ । कैलालीको गौरिफन्टा, कञ्चनपुरको गड्डाचौकी लगायतका सीमा नाकामा बुधबार बिहानदेखि चेकजाँच कडा पारिएको छ ।
भारतका विभिन्न शहरबाट घर फर्किने नेपाली नागरिकलाई परिचयपत्र अनिवार्य गरिएको छ । त्यस्तै, भारततर्फ जानेहरुलाई आधार कार्ड लगायतका कागजपत्र अनिवार्य गरिएको छ । भारततर्फ पनि सुरक्षाकर्मीहरुले नेपालीहरुलाई नेपाली परिचयपत्र चेकजाँच पछि मात्र जान दिएका छन् ।
मंगलबार जेनजी प्रदर्शनकारीहरुले कारागारमा आक्रमण गरेपछि कैलालीसहित सुदूरपश्चिमका ८ जिल्ला कारागारका करिब एक हजार चार सय कैदीबन्दी भागेको बताइएको छ । भागेका कैदीबन्दीहरु भारततर्फ जान सक्ने भन्दै सीमानाकामा सुरक्षा फौज तैनाथ गरिएको छ ।
कैलालीमा अहिले अनिश्चितकालीन कफ्र्यु लागेको छ । नेपालका निषेधाज्ञा र कफ्र्यू लागेका कारण भारतबाट घर फर्किनेहरू बाटो मै अलपत्र परेका छन् ।
