धरानवासीलाई एक वर्षभित्र पानी खुवाउँछौँ, एक गाग्री पानीले धरानवासीको माग सम्बोधन हुँदैनः मन्त्री यादव
पढ्न लाग्ने समय :
खानेपानीमन्त्री प्रदीप यादवले धरानमा पानीको समस्या एक वर्षभित्र समाधान गरेर छोड्ने प्रतिवद्धता जनाउनुभएको छ । शुक्रवार मन्त्रालयमा पत्रकार सम्मेलनका क्रममा उहाँले सो प्रतिवद्धता जनाउनुभएको हो । उहाँले पानी दिने काम संघीय सरकारको भएको भन्दै आफ्ना जनतालाई एक वर्ष भित्रमा पानी खुवाउने प्रतिवद्धता जनाउनु भयो । उहाँले धरानमा पहिलादेखि नै पानीको समस्या रहेका उल्लेख गर्दै अहिले पनि जग्गा प्राप्तिको समस्या समाधान भए टेण्डर प्रक्रिया अघि बढाउने बताउनु भयो । उहाँले धरानवासीलाई पानी खुवाउनका लागि करिव ६ अर्ब आवश्यक रहेको भन्दै उहाँले त्यसका लागि आफूले एडिबीसँग बिहीवार छलफल गरेको पनि बताउनु भयो । उहाँले धरान उपमहानगरपालिकाका मेयर हर्क साम्पाङले स्टण्टबाजी गरेको आरोप लगाउनु भयो । उहाँले गाग्रोमा भरेर दिएको पानीले धरानवासीको पानीको समस्या समाधान नहुने बताउनु भयो ।
उहाँले भन्नुभयो, ‘धरानमा पानीको समस्या पहिलादेखि नै थियो । धरान लगायत त्यस्तो धेरै डाँडाकाँडामा त्यस्तो समस्या थियो । धरानमा खानेपानी मन्त्रालयको मातहतमा रहेका नेपाल खानेपानी संस्थानले पानी दिइरहेको थियो । तर त्यहाँका बहादुर मेयर सावले अहिलेको होइन । यो भन्दा पहिलाको मेयर सावले बहादुरी देखाउनु भयो । बहादुरी के देखाउनु भयो भने खानेपानी मन्त्रालयको जुन नेपाल खानेपानी संस्थान छ । उहाँहरुबाट पानी लिँदिन । म आफैँ सक्षम छु, म आफ्ना जनतालाई आफैँ पानी ल्याएर खुवाउँछु भनेर बहादुरी देखाउनु भयो । खानेपानी संस्थानको सबै अधिकार आफ्नो मातहतमा व्यवस्थापन बोर्ड बनाएर लिइहाल्नु भयो । हाइज्याक गर्नुभयो । तर सक्नुभएन । चुनाव भयो । अहिलेको मेयर साव हर्कजीले पानी ल्याउँछु भनेर कुद्नुभयो । कतै कतै पानी त ल्याउनु भयो । एउटा वाडमा पनि पुग्दैन । नपुगेपछि केन्द्रलाई गुहार्नुभयो । तर संघले आफ्नो नागरिक, नेपाली जनतालाई पानी दिनको निमित्त आतु छ, सम्माननीय प्रधानमन्त्रीजीले प्रधानमन्त्रीको जिम्मेवारी पाइसकेपछि र म खानेपानी मन्त्री बनिसकेपछि मलाई बोलाएर १५ दिनपछि धरानको विषयमा भन्नुभयो । त्यहाँ कसरी पानी जान्छ, तयारी गर्नुस् भन्नुभयो । त्यहाँ कसरी दिने भन्ने प्लान बनाएँ । त्यहाँ बजेट ठूलो छ । करिव करिव ६ अर्बको बजेट चाहिन्छ । मैले अर्थमन्त्रीजीलाई समन्वय गर्न गएँ । उहाँले एडिबीको ऋण सहयोग धरानमा लागू गर्नुस् र धरानका नागरिकलाई खानेपानीको समाधान गर्नुस् । त्यहाँ जग्गाको समस्या छ । स्थानीय निकायले त्यो गर्छ । हर्क साम्पाङजीको काम जग्गा दिलाउने काम गर्नुपर्छ । त्यो सबै काम भएपछि हामी धरानमा खानेपानीको काम गर्छौं । एडिबीका कन्ट्रि डाइरेक्टरसँग छलफल गरिसकेका छौँ । गाग्रो लिएर जाने, पानी देउ भन्ने । गाग्रीमा पानी भरेर दिएर पुग्दैन, त्यसको लागि बजेट दिनुपर्छ । मिडिया स्टण्ट गर्नु अलग कुरा हो । काम गर्नु अलग कुरा हो । अहिलेको सरकारले प्रधानमन्त्रीको निर्देशन काम गरेर देखाउन भन्ने छ, त्यहीअनुसार काम गरेर देखाउँछौँ । काम गरेर देखाउँछौँ । स्टण्ट गर्दैनौँ । स्टण्ट गर्ने काम स्टटबाजीको हो । तिनीहरुको पसल त्यसैगरी चल्छ ।’
मन्त्री यादवले एक वर्षभित्र धरानमा पानीको समस्या समाधान हुने बताउनु भयो ।
