‘सुशासनको वेग रोक्दैनौँ, प्रतिशोधको अध्याय दोहोरिने छैन’
पढ्न लाग्ने समय :
काठमाडौं : रास्वपाका सभापति रवि लामिछानेले प्रतिपक्षमाथि प्रतिशोधको अध्याय अब नदोहोरिने बताएका छन् । प्रतिनिधिसभाको पहिलो बैठकमा बोल्दै प्रतिपक्षीमाथि अहंकार रास्वपाले नगर्ने बताए ।
उनले भने, ‘प्रतिशोधको त्यो अध्याय अब दोहोरिने छैन । आस्थाका आधारमा फरक व्यवहार हुने छैन। अब अन्यायपूर्ण विधि नै मिचेर सुन्न मन लागेका कुरा नसुनाऔँ भनेर कसैको माइक काटिने छैन। संसदीय समितिहरूमा संख्याकै बलमा प्रतिशोध र अत्याचार हुने छैन, तर सुशासनको वेग भने रोकिने छैन ।’
उनले सत्ता छाड्न परेपछि विदेशी चलखेल भन्ने गैरजिम्मेवार र सस्तो खेल अब नहुने बताए ।
उनले थपे, ‘नेता र पार्टीका सिफारिसबाट नियुक्ति लिएकाहरूले स्वैच्छिक रूपमा राजीनामा दिँदै विधिको पालना गर्नमा सहयोग गरिदिनुहुन म अपिल गर्न चाहन्छु। हाम्रो नैतिक जिम्मेवारी उस्तै छ। अब सावित गर्नु छ कि हामीलाई केवल प्रश्न सोध्न मात्र आउँदैन, उत्तर दिन पनि आउँछ। समस्या देखाउन मात्र होइन, समाधान खोज्न पनि आउँछ।’
प्रतिपक्ष दलहरूलाई आफूहरूमाथि चौबीसै घण्टा निगरानी गरिदिन आग्रह गरे । उनले भने, ‘शासनमा तपाईँहरूको लामो अनुभव छ, हाम्रा कमजोरी उजागर गरिदिनुहोला, गल्ती देखाइदिनुहोला। यदि हामीले बाटो बिरायौँ भने सच्चाइदिनुहोला। यदि हामी जनताबाट टाढा हुन खोज्यौँ भने हामीलाई जनताको आवाज सम्झाइदिनुहोला । हामीबाट अहंकार नबढोस्, हामीमा कुनै अहंकार नछाओस्। हाम्रा निर्णयहरू एकतर्फी नहुन्। लोकतन्त्रमा सत्ता पक्ष र प्रतिपक्ष प्रतिस्पर्धी मात्र होइनन्, एक अर्काका पूरक पनि हुन् ।’
