नाउपा त्याग्दै रेशमद्वारा नयाँ पार्टी घोषणा
पढ्न लाग्ने समय :
धनगढी, भदौ २९ गते ।
नागरिक उन्मुक्ति पार्टीका संस्थापक रेशमलाल चौधरीले पार्टी परित्याग गरेका छन् । उनले नयाँ पार्टी समेत घोषणा गरेका छन् । २०७२ साल भदौ ७ गतेको चर्चित टीकापुर हत्याकाण्डको योजनाकारको रुपमा लामो समय जेल बसेका रेशमले जसपा परित्याग गरेर नागरिक उन्मुक्ति पार्टी गठन गरेका थिए । कानुनी रुपमा आफूले नेतृत्व गर्न नमिलेपछि रेशम संरक्षकको रुपमा बसेर श्रीमती रञ्जिता श्रेष्ठ चौधरीलाई अध्यक्ष बनाएर दल दर्ता गरिएको थियो । तर, पछिल्ला वर्षहरुमा रेशम दम्पत्तिबीच नै सत्ताको झगडा र चरम विवाद बढेपछि नागरिक उन्मुक्ति पार्टी नै संकटमा परेको थियो ।
जेनजी युवा आन्दोलनलाई नैतिक रुपमा समर्थन जनाएका रेशमले आन्दोलनको ल्याएको नयाँ राजनीतिक परिवर्तन लगत्तै ‘नागरिक उन्मुक्ति नेपाल पार्टी, घोषणा गरेका छन् । उनले पार्टीमा धेरै विवाद हुँदै आएको बताउँदै त्यसमा पनि पछिल्लो पटक जेनजी आन्दोलनका क्रममा पार्टीले गरेको निर्णयप्रति आफूलाई चित्त नबुझेकोले पार्टी परित्याग गरेको बताए । जेनजी आन्दोलनलाई नाउपाले समर्थन गरेकोमा अध्यक्ष रञ्जिताले आठ दलको संयुक्त विज्ञप्तीमार्फत संसद पुनस्थापनाको माग गरेकी छिन् ।
