कञ्चनपुरमा १ ग्राम ७७० मिलिग्राम खैरो हेरोइनजस्तो पदार्थसहित चार जना पक्राउ
पढ्न लाग्ने समय :
कञ्चनपुरको पुनर्वास नगरपालिका–१०, चकमेली बजार नजिकै हुलाकी सडकखण्डबाट प्रहरीले अवैध लागूऔषध खैरो हेरोइनजस्तो देखिने धुलो पदार्थसहित चार जनालाई पक्राउ गरेको छ।
इलाका प्रहरी कार्यालय त्रिभुवनबस्ती, कञ्चनपुरबाट खटिएको प्रहरी टोलीले शुक्रबार दिउँसो शंका लागि चेकजाँच गर्ने क्रममा कैलालीको धनगढी उपमहानगरपालिका–४ चौराह बस्ने ३० वर्षीय मनिष भट्ट, धनगढी–३ बडरा बस्ने ३० वर्षीय हरि भन्ने हरिष खड्का र सोही स्थानका ३० वर्षीय बिरेन्द्र चौधरीलाई पक्राउ गरेको हो।
उनीहरूको साथबाट खैरो हेरोइनजस्तो देखिने धुलो पदार्थ १ ग्राम ४१० मिलिग्राम बरामद भएको प्रहरीले जनाएको छ। साथै, लागूऔषध सेवन तथा प्रयोगमा प्रयोग हुने सामग्रीसमेत बरामद गरिएको बताइएको छ।
यसैगरी, सोही स्थानबाट प्रहरीले कैलालीको धनगढी उपमहानगरपालिका–२ चौराह बस्ने २७ वर्षीय नरेन्द्र बहादुर विष्टलाई पनि पक्राउ गरेको छ। उनको साथबाट ३६० मिलिग्राम खैरो हेरोइनजस्तो देखिने धुलो पदार्थ बरामद भएको प्रहरीले जनाएको छ।
दुवै घटनामा बरामद पदार्थ खैरो हेरोइनजस्तो देखिए पनि त्यसको आधिकारिक पुष्टि सम्बन्धित परीक्षणपछि हुने प्रहरीले जनाएको छ। पक्राउ परेका चारै जनामाथि आवश्यक अनुसन्धान तथा कानुनी प्रक्रिया अघि बढाइएको छ।
