वैकल्पिक राजनीतिमा मुद्दा र विचार मिल्ने दलहरुसँग सहकार्य गर्छौंः डा. बाबुराम भट्टराई
पढ्न लाग्ने समय :
नेपाल समाजवादी पार्टी (नयाँ शक्ति) का अध्यक्ष डा.बाबुराम भट्टराईले आफ्नो पार्टीले शुरु गरेको विकल्पको राजनीतिले कुनै पार्टी वा विचारलाई निषेध गर्ने उद्देश्य नरहेको बताउनुभएको छ ।
नेपाल समाजवादी पार्टी (नयाँ शक्ति) ले बुधवार काठमाडौंमा आयोजना गरेको नयाँ युगको कार्यभार ः वैकल्पिक राजनीतिक औचित्य र आधार विषयक अन्तरसंवाद कार्यक्रममा बोल्दै उहाँले यस्तो बताउनुभएको हो । उहाँले आफ्नो पार्टीको वैकल्पिक राजनीतिमा मुद्दा र विचार मिल्ने दलहरुलाई रुपान्तरण गरेरे अघि बढ्ने बताउनु भयो । उहाँले युगको आवश्यकता अनुसार विचारसहितको वैकल्पिक राजनीति शुरु गरेको दाबी गर्नुभयो । वर्तमान दलहरुले मुलुकलाई अगाडि बढाउन नसक्ने भन्दै उहाँले नयाँ विचार र नयाँ युगलाई मार्ग प्रशस्त गर्नुपर्ने जिकिर गर्नुभयो । उहाँले नयाँ शक्ति पार्टी कुनै दलको विचार वा आस्थाको विरुद्धमा नभइ नयाँ युगको माग भएको दाबी गर्नुभयो ।
उहाँले भन्नुभयो, ‘उदारवादी लोकतन्त्रले स्वतन्त्रता त दियो तर पूँजीवादी अर्थतन्त्रले बजार अर्थतन्त्रले केही मान्छे धनी त बनायो तर असमानता ल्यायो भनेर पुष्पालालहरुले अर्को धार ल्याए । हामी त्यसको सम्मान गर्छौं तर अहिले त्यतिले पुगेन अब नयाँ युगको नयाँ आवश्यकता अनुसार नयाँ विचार ः नयाँ नीति र कार्यक्रमसहितको नयाँ वैकल्पिक शक्ति चाहियो भनेर हामीले शुरु गरेको हो कसैलाई गाली वा निशेध गर्ने ढंगले हामी आएको होइन । युगको आवश्यकताले हामीले ल्याएको हो, हामी अगाडि जानु पर्छ र सम्भव भएसम्म उहाँहरु (सबै दलहरु) लाई पनि रुपान्तरण गरेर लिएर जाने हाम्रो प्रयत्न हुन्छ, मुद्दा मिल्ने विषयमा हामी सहकार्य गर्छौं । तर उहाँहरु (अरु दलहरु) बाट मात्र पर्याप्त छैन भन्ने हाम्रो बुझाइ हो । हामीले कसैको पनि विरुद्धमा नयाँ शक्ति ल्याएको होइन । तपाईको युग र समय सकियो अब नयाँ विचार र नयाँ युगलाई ठाउँ छोड्नुस् भन्ने हाम्रो आग्रह हो ।’
अध्यक्ष भट्टराईले पुँजीवाद र उद्योग धन्दाको विकास नभएसम्म देशमा उन्नत लोकतान्त्रिक प्रणाली नआउने भन्दै उद्यमशिलतालाई जोड दिनुपर्ने बताउनु भयो । अर्थतन्त्रको नीति अनुसार सामन्तवाद भन्दा पुँजीवाद प्रगतिशील भएको उहाँको भनाइ छ ।
