बाजुराको लाम्पाटाका स्थानीयमाथि कुटपिट गर्ने हुम्लाका २३ जना पक्राउ
पढ्न लाग्ने समय :
बाजुरा : बाजुराको हिमाली गाउँपालिका–३ लाम्पाटाका स्थानीयमाथि कुटपिट गर्ने हुम्लाको खार्पुनाथ गाउँपालिकाका २३ जनालाई प्रहरीले पक्राउ गरेको छ।
रानीसैन–च्याँचौर लाम्पाटा क्षेत्रको सीमा विवादलाई लिएर गत जेठ ३ गते खार्पुनाथ गाउँपालिकाका स्थानीयले लाम्पाटामा बसोबास गर्दै आएका करिब १० परिवारमाथि आक्रमण गरी कुटपिट गरेका थिए। घटनापछि फरार रहेका उनीहरूको खोजी कार्य जारी रहेकामा प्रहरीले पक्राउ गर्न सफल भएको हो। जिल्ला प्रहरी कार्यालय बाजुराका अनुसार पक्राउ परेकालाई थप अनुसन्धानका लागि बाजुरा ल्याउने प्रक्रिया भइरहेको छ।
गत जेठको पहिलो सातादेखि हिमाली गाउँपालिकाको पहलमा प्रदेश सरकारको चार लाख रुपियाँको लागतमा लाम्पाटामा अस्थायी प्रहरी चौकी निर्माणको काम सुरु गरिएको थियो। सीमा सुरक्षा तथा वन्यजन्तुको चोरी निकासी नियन्त्रणका लागि चौकी स्थापना गर्न लागिएको जनाइएको छ।
प्रहरी चौकी निर्माणको विरोध गर्दै खार्पुनाथ गाउँपालिकाका केही स्थानीय लाम्पाटा पुगेका थिए। उनीहरूले स्थानीयवासी तथा चौकी निर्माणमा खटिएका मिस्त्री र ज्यामीमाथि कुटपिट गरी त्यहाँबाट लखेटेका थिए।
घटनामा पेमागारा गुरुङ, लक्ष्मी गुरुङ, नरबहादुर गुरुङ र मीन कुँवर गम्भीर घाइते भएका थिए। आक्रमणकारीले स्थानीयका घरमा समेत क्षति पुर्याएर फरार भएका थिए।
जिल्ला प्रहरी कार्यालय बाजुराका सूचना अधिकारी नरेशबहादुर शाहीले सुरक्षा निकायको सक्रियतामा उनीहरूलाई पक्राउ गरिएको बताउनुभयो। उहाँका अनुसार गत जेठ ३० गते जिल्ला प्रशासन कार्यालयको पहल तथा गृह मन्त्रालयको निर्देशनमा लाम्पाटामा संयुक्त सुरक्षा बेस क्याम्प स्थापना गरिएपछि खोजी कार्य प्रभावकारी बनेको थियो।
पक्राउ परेकालाई जिल्ला प्रहरी कार्यालयमा ल्याएपछि आवश्यक अनुसन्धान गरी कानुनबमोजिम कारबाही प्रक्रिया अघि बढाइने प्रहरीले जनाएको छ।
