प्रधानमन्त्रीको प्रश्न– सरकारी सम्पत्तिमा आगो लगाउनेलाई कसरी नेपाली भन्ने ?
पढ्न लाग्ने समय :
न्युज नेपाल समाचार
धनगढी, भदौ २९ गते । नवनियुक्त प्रधानमन्त्री सुशीला कार्कीले सरकारी संस्था र सम्पत्तिमा आगोे लगाउनेहरुलाई नेपाली भन्न नसकिने जिकिर गरेकी छिन् । प्रधानमन्त्री कार्कीले योजनावद्ध रुपमा छानीछानी सरकारी, सार्वजनिक सम्पत्ति, व्यक्तिगत सम्पत्तिमाथि आक्रमण भएको बताइन् ।
आइतबार सिंहदरबारमा पदभार ग्रहण गर्दै प्रधानमन्त्रीले राज्य सञ्चालन गर्ने संस्थाहरुमाथि छानीछानी आगजानी गरिएको बताइन् । “सुरक्षा निकाय, अदालत, प्रशासनिक भवनहरुमा आजगानी हुँदा महत्वपूर्ण कागजातहरु नष्ट भएका छन्” उनले भनिन्– यो सबै देखेर मलाई लाज समेत लागेको छ ।
संसद, सिंहदरबार, अदालत, मन्त्रालय आदि सरकारी सम्पत्तिमा आगजनी नेपाली हुन नसक्ने प्रधानमन्त्री कार्कीको भनाई छ । “सरकारी संस्थामा आगजनी गर्नेलाई नेपाली कसरी भन्ने ?” प्रश्न गर्दै उनले यसप्रकारको घटना पहिलो पटक भएको पनि जिकिर गरिन् । उनले पूर्वनियोजित योजना अनुसार नै यस्तो किसिमको घटना भएको आशंका गरिन् । भौतिक क्षतिलाई बनाउन सकिए पनि महत्वपूर्ण दस्तावेजहरु अब पाउन नसकिने उनको भनाई छ ।
प्रधानमन्त्री कार्कीले आगजानी गर्नेलाई अनुसन्धान गरेर कारबाहीको दायरमा ल्याउने दृढता पनि व्यक्त गरिन् । प्रधानमन्त्रीले प्रहरी बिटहरु, सर्वोच्च अदालत, उच्च अदालत, जिल्ला अदालत, सिंहदरबार लगायतमा लगाइएको आगोले सम्पूर्ण नष्ट भएर देश शुन्यमा पुगेको बताइन् । जेनजी नामका आन्दोलनमा भदौ २४ गते प्रर्दशनकारीहरुले विभिन्न सरकारी संस्था, राजनितिक दलका पार्टी कार्यलय, व्यवसायिक प्रतिष्ठान तथा व्यक्तिका घरहरुमा आगजानी गरिएको थियो ।
