कैलालीमा स्कुलबाट बेपत्ता भएकी बालिका मृत फेला
पढ्न लाग्ने समय :
धनगढीः कैलालीको लम्कीचुहामा विद्यालयबाट निर्धारित समय अगावै छुटेकी एक बालिका मङ्गलवार बेपत्ता भएकोमा बुधवार मृत फेला परेकी छन्। लम्कीचुहा नगरपालिका–१ स्थित जनचेतना प्राथमिक विद्यालयमा नर्सरीमा अध्ययनरत ६ वर्षीया मनिषा विक बुधवार बिहान १०ः४० मा मृत फेला परेकी हुन्।
वडा नम्बर ४ निवासी मनिषालाई मङ्गलवार बिहान करिब ७ बजे उनकी हजुरआमाले विद्यालय पुर्याएकी थिइन्। विद्यालयको नियमित बिदा समय ११ बजे भए पनि मंगलबार भने ९ बजे नै बिदा भएको थियो। हजुरआमा ११ बजे मात्र विद्यालय लिन आउँदा मनिषा विद्यालयमा थिइनन्।
बालिका बेपत्ता भएपछि खोजी कार्य तीव्र पारिएको थियो। बुधवार प्रहरी र स्थानीयले खोजतालास गर्ने क्रममा लाम्कीचुहा(५ चौरीस्थित रोरा खोला किनारमा मनिषाको शव फेला परेको जिल्ला प्रहरी कार्यालय कैलालीका प्रवक्ता डिएसपी योगेन्द्र तिमिल्सिनले जनाकारी दिए।घटनाको थप अनुसन्धान भइरहेको प्रहरीले जनाएको छ।
