कैलालीको गोदावरी नदीले दुई महिला बगायो
पढ्न लाग्ने समय :
धनगढी : कैलालीको गोदावरी नदीले २ महिला बगाएको छ। जिल्लाको गोदावरी नगरपालिका-३ मा गोदावरी नदीले बगाएको एक महिलाको शव फेला परेको छ भने अर्की महिला बेपत्ता छिन् ।
शुक्रवार बिहान आएको बाढीले गोदावरी नगरपालिका-४ बस्ने ५५ वर्षीया महेश्वरी धमला र ४० वर्षीया कल्पना साउँदलाई बगाएको थियो ।
प्रहरीका अनुसार बाढीमा बगेकी धमलाको शव गोदावरी नदीस्थित आर्यघाट नजिक भेटिएको छ।
उनकाअनुसार शुक्रवार बिहान करिब पौने ७ बजेतिर नदीमा एक्कासि आएको बाढीले महिलाजस्ता देखिने दुई जनालाई बगाएको भन्दै गोदावरीस्थित शिव मन्दिरका पुजारी शक्रानन्द गिरीले प्रहरीलाई खबर गरेका थिए ।
खबर प्राप्त हुनासाथ अस्थायी प्रहरी पोस्ट गोदावरी र इलाका प्रहरी कार्यालय मालाखेतीबाट प्रहरी टोली घटनास्थलतर्फ परिचालन गरिएको थियो ।
दुवै महिला शुक्रवार बिहान करिब ६ बजे जंगलमा च्याउ टिप्न घरबाट निस्किएका थिए । त्यसक्रममा खोलामा आएको बाढीले उनीहरूलाई बगाएको प्रारम्भिक जानकारी प्राप्त भएको प्रहरीले जनाएको छ । नदीमा बेपत्ता महिलाको खोजी भइरहेको छ ।
