संघकै गठबन्धन अनुरुप प्रदेशमा सरकार बनाउन खोजे संवैधानिक जटिलता आउँछः शेखर कोइराला
पढ्न लाग्ने समय :
काठमाडौं । नेपाली कांग्रेसका नेता डा. शेखर कोइरालाले प्रदेश सरकार पटक पटक बन्नु र ढल्नु संघीयताको स्थायित्वका लागि बेठिक हुने बताएका छन् ।
मंगलबार सामाजिक संजालमार्फत कोइरालाले यसले संघीयता विरोधीको स्वरलाई मलजल गर्ने बताएका हुन् । उनले वर्तमान प्रदेश सभाका अंकगणित हेर्दा संघकै गठबन्धन अनुरुप प्रदेशमा पनि सरकार बनाउन खोजे कुनै प्रदेशमा संवैधानिक र कानूनी जटिलता आउने तथा कुनै प्रदेश मध्यावधिमा जाने बताए ।
उनले भनेका छन्, ‘निर्वाचन भएको डेढवर्षमै पटक–पटक प्रदेश सरकारहरु बन्नु र ढल्नु विकास र संघीयताको स्थायीत्वका लागि बेठिक हुन् । हाम्रो देशमा कुनै स्थायी गठबन्धन नभएकाले संघ र प्रदेशमा एउटै गठबन्धन हुनुपर्छ भन्ने छैन र हुनु हुँदैन । वर्तमान प्रदेश सभाका अंकगणित हेर्दा संघकै गठबन्धन अनुरुप प्रदेशमा पनि सरकार बनाउन खोजे कुनै प्रदेशमा संवैधानिक र कानूनी जटिलता आउने तथा कुनै प्रदेश मध्यावधिमा जाने देखिन्छ । मध्यावधि निर्वाचन आजको आवश्यकता र बाध्यता दुवै होइन । यसले संघीयता विरोधी स्वरलाई मलजल गर्दछ । तसर्थ हरेक विकल्पमा छलफल गरौं र हालका प्रदेश सरकारहरुलाई स्थायित्व दिऊँ ।’
