लुटिएका सामान खरिद बिक्री नगर्न प्रहरीको चेतावनी
पढ्न लाग्ने समय :
न्युज नेपाल समाचार
धनगढी, भदौ २७ गते । नेपाल प्रहरीको केन्द्रीय अनुसन्धान ब्यूरो (सीआईबी) ले भदौ जेनजी आन्दोलनका क्रममा लुटिएका सामान खरिद बिक्री नगर्न चेतावनी दिएको छ । जेनजी आन्दोलनका क्रममा भदौ २३ र २४ गते राजधानी काठमाडौंसहित देशका विभिन्न शहरमा भएका सार्वजनिक, सरकारी र निजी सम्पत्तिमाथिको आक्रमण, तोडफोड र आगजनीका क्रममा व्यापक रुपमा लुटपाट र चोरी भएको थियो ।
सिआईबीले जेनजी प्रदर्शनको फाइदा उठाउँदै चोरी भएका सामान किनेको वा लुकाएको पाइएमा कडा कानुनी कारबाही गरिने चेतावनी समेत दिएको छ ।
सिआईबीले शुक्रबार एक प्रेस विज्ञप्ति जारी गर्दै प्रदर्शनका क्रममा सरकारी तथा निजी भवन, बैंक तथा वित्तीय संस्थाहरूमा आगजनी र तोडफोड गर्नुअघि त्यहाँबाट ऐतिहासिक दस्तावेज, बहुमूल्य वस्तु, नगद, र अन्य महत्वपूर्ण जिन्सी सामान लुटपाट भएको सूचना प्राप्त भएको जनाएको छ । विज्ञप्तीमा लुटिएका सामग्रीहरू बजारमा बिक्री–वितरण भइरहेको भन्ने सूचनाका आधारमा ब्यूरो र अन्य प्रहरी कार्यालयहरूले अनुसन्धान अगाडि बढाएको उल्लेख छ ।
‘चोरी तथा लुटपाट भएका सामानहरूको खरिद, बिक्री तथा सञ्चय गरेको पाइएमा प्रचलित कानुनबमोजिम अनुसन्धान गरी कारबाही हुने व्यहोरा जानकारी गराइन्छ,’ ब्यूरोद्वारा जारी विज्ञप्तिमा भनिएको छ । प्रहरीले त्यस्ता लुटिएका सामानहरू कसैले बिक्री गर्न ल्याएमा वा कसैले खरिद गरेको जानकारी पाएमा तत्काल नजिकको सुरक्षा निकायमा खबर गर्न सर्वसाधारणलाई आग्रह गरेको छ । यदि कसैले त्यस्ता सामान फेला पारेमा वा प्राप्त गरेमा नजिकको प्रहरी कार्यालयमा बुझाउनसमेत अनुरोध गरिएको छ ।
प्रदर्शनको अराजक अवस्थाको फाइदा उठाउँदै आपराधिक समूहहरूले विभिन्न स्थानबाट महत्वपूर्ण कागजात र धनमाल लुटेको र तिनलाई सामान्य बजारमा बेच्न खोजिरहेको हुनसक्ने प्रहरीको आशंका छ ।
