लागू औषध सहित पाँच जना पक्राउ
पढ्न लाग्ने समय :
न्युज नेपाल समाचार
धनगढी, भदौ १४ गते ।
कैलालीका विभिन्न स्थानबाट लागू औषध सहित पाँच जना पक्राउ परेका छन् । प्रहरीले साढे पाँच किलो चरेश र करिब पाँच ग्राम ब्राउन सुगर बरामद समेत गरेको छ ।
जिल्ला प्रहरी कार्यालय, कैलालीका अनुसार शुक्रबार धनगढी उपमहानगरपालिका–२ त्रिनगर ब्यारेलबाट डोटीको शिखर नगरपालिका–८ घर भई हाल गोदावरी नगरपालिका– १ बस्ने ३५ वर्षीय वीरबहादुर रावललाई दुई दशमलव ७६० ग्राम ब्राउन सुगरसहित पक्राउ गरिएको छ । प्रहरीले वीरबहादुरले चलाएको सुपप्र ०४–००१ प ०६६५ नम्बरको मोटरसाइकल समेत नियन्त्रणमा लिएको जनाएको छ ।
शुक्रबार कैलालीको चुरे गाउँपालिका–३ का मोहन मल्ललाई मोबाईलको खोलभित्र लुकाएको ५९० मिलिग्राम ब्राउन सुगरसहित पक्राउ गरिएको छ । त्यस्तै, धनगढी उपमहानगरपालिका–२ मिलन चोकबाट बझाङको बुंगल नगरपालिका–८ घर भई हाल धनगढी–२ मा होटल सञ्चालन गर्दै आएका ३२ वर्षीय राम बोहरालाई ५ किलो ६९० ग्राम चरेश सहित नियन्त्रणमा लिएको प्रहरीले जनाएको छ ।
शुक्रबार नै धनगढी–१२ जुगेडाबाट २३ वर्षीय विजय विक र प्रदीप रानालाई ७४० मिलिग्राम ब्राउन सुगरसहित पक्राउ गरिएको छ । प्रहरीले उनीहरुले चलाएको सुपप्र ०१–०१३ प २३४५ नम्बरको मोटरसाइकल समेत नियन्त्रणमा लिएको जनाएको छ ।
