रोमानियाका राष्ट्रपतिद्वारा नाटोको प्रमुख पदमा उम्मेदवारी घोषणा
पढ्न लाग्ने समय :
रोमानियाका राष्ट्रपति क्लाउस इओहानिसले नाटोको प्रमुखका रूपमा जेन्स स्टोल्टनबर्गको स्थान लिन आफ्नो उम्मेदवारी घोषणा गरेका छन् । साथै उनले गठबन्धनका लागि महत्वपूर्ण समयमा ‘परिप्रेक्ष्यको नवीकरण’ को वाचा गरेका छन् ।
पछिल्लो दुई वर्षदेखि पश्चिमी रक्षा गठबन्धनले युक्रेनमा रुसको आक्रमणसामु चुनौतीपूर्ण सुरक्षा वातावरणको सामना गरेको छ । युक्रेनको सीमासँग जोडिएको रोमानियाका राष्ट्रपति इओहानिसले नाटो महासचिव पदका लागि प्रतिस्पर्धामा सामेल हुने निर्णय गरेको बताए ।
अमेरिका, बेलायत र जर्मनीले आफ्नो सम्भावित उम्मेदवारीमा समर्थन व्यक्त गरेपछि डच प्रधानमन्त्री मार्क रुट्टेलाई गठबन्धनको नेतृत्व गर्ने र स्टोल्टनबर्गको स्थान लिनका लागि सबैभन्दा अग्रणी मानिन्छ । यद्यपि हङ्गेरीले रुट्टेलाई समर्थन नगर्ने बताएको छ ।
रुट्टेले यसअघि हङ्गेरी सरकारको आलोचना गरेका थिए । एक दशकसम्म नाटोको निरीक्षण गर्ने नर्वेका पूर्वप्रधानमन्त्री स्टोल्टनबर्गको उत्तराधिकारीको घोषणा वासिङ्टनमा जुलाई शिखर सम्मेलनभन्दा अघि हुने अपेक्षा गरिएको छ ।
