रोकिएन, छाउपडि कुप्रथाका कारण महिलाको ज्यान जाने क्रम
पढ्न लाग्ने समय :
न्युज नेपाल समाचार
धनगढी भदौ १३
छाउपडी कुप्रथाका कारण अछाममा पुनः दुई जनाको ज्यान गएको छ । अछामको पञ्चदेवल विनायक नगरपालिका वडा नम्बर ८ सेलापानीमा शुक्रबार बिहान माथिबाट खसेको ढुंगा लागेर छाउगोठमा सुतेकी एक बालिका र एक महिलाको मृत्यु भएपछि कति जना महिलाको ज्यान गएपछि छाउपडी कुप्रथा अन्त्य हुनेछ भन्ने बहस चलेको छ ।
शुक्रबार बिहान करिब साढे पाँच बजे माथिबाट खसेको ढुंगा लागेर छाउगोठमा सृतेकी ३५ वर्षीया निम जैशी खनाल र सात वर्षीया कविता भण्डारीले अकालमा ज्यान गुमाएका छन् । दुर्घटनामा ४० बर्षिया रत्ना भण्डारी गम्भीर रुपमा घाइते हुनु भएको छ । यो घटनाले पुनः एक पटक सुदूरपश्चिम र कर्णाली प्रदेशमा अहिले पनि कायम रहेको छाउपडी कुप्रथाले कहिलेसम्म महिलाको ज्यान लिइराख्ने भन्ने प्रश्न उठेको छ ।
गत असारको अन्तिम साता कञ्चनपुरको कृष्णपुर नगरपालिका वडा नम्बर १ की कमला आउजीले छाउगोठमै सर्पको टोकाईबाट ज्यान गुमाएकी थिइन् । कमलाले अकालमा ज्यान गुमाएपछि कन्चनपुरमा एक पटक फेरि छाउगोठ भत्काउने अभियान सन्चालन गरियो । प्रदेशभरी यो घटनाले तरंग सिर्जना गर्यो । तर, कुनै उपलब्धी भएको पाइएन । अहिले फेरि अछामको पञ्चदेवल बिनायक नगरपालिका सेलापानीमा छाउपडी कुप्रथाका कारण निम र बालिका कविताको अकालमै ज्यान गएको छ ।
वडा नम्बर ८ का अध्यक्ष छत्रबहादुर शाहीका अनुसार निम र रत्ना महिनाबारी भएपछि पाच दिनदेखि घर नजिक खुला आकासमुनि खेतमा पाल टाँगेर सुत्दै आएका थिए । भिरालो जमिनको फेदमा पाल टाङ्गेर सुतेका उनिहरुको माथीबाट खसेको ढुङ्गा लागेको थियो । घटनामा कविता र निमको घटनास्थलमै मृत्यु भएको थियो । गम्भीर घाइते रत्नालाई उपचारको लागि सुर्खेत लगिएको छ । निमका श्रीमानको गत वर्ष मात्रै निधन भएको थियो । निमका देवर बिमल खनालले दाइ वितेको एक वर्ष नपुग्दै छाउ बार्ने कुसंस्कारका कारण भाउजु पनि गुमाउनु परेको पीडा बताउनु भयो । उहाँ भन्नु भयो ,गत वर्ष दाक्षर्् गुमायौ ,यस वर्ष भाउजु । उहाँ थप्नु भयो , हाम्रो तिर छाउ मान्ने चलन अझै कायम छ ।
अछाममा छाउपडी कुप्रथाका कारण अकालमा ज्यान गुमाउनु परेको यो पहिलो घटना भने होईन । घटना भएपछि जुर्मुराउने सामाजिक सञ्जाल र काठमाडौका ठूला होटलहरुमा हुने गोष्ठी र सेमिनारहरुले अहिलेसम्म कुनै प्रभाव दिन सकेका छैनन् । प्रत्यक घटनापछि जनप्रतिनिधी तथा प्रशासन छाउगोठ भत्काउन अग्रसर हुने गरेका छन्, तर छाउगोठ साच्चै नै अन्त्य गर्ने गतिलो पहल अझै भएको छैन । छाउगोठ भत्काउने अभियान पटक पटक चलाएपनि नियन्त्रण नभएको पञ्चदेवल विनायक नगरपालिका वडा नम्बर ८ का अध्यक्ष छत्र बहादुर शाही बताउनु हुन्छ । उहाँले भन्नु भयो, पटक पटक राजनितिक दल , प्रही प्रशासन मिलेर गोठ भत्काउछौ तर पछि बनाई हाल्छन् ।
महिलाहरुका लागि अभिसाप र सभ्य समाजको लागि कलंकका रुपमा रहेको छाउपडी कुप्रथाका कारण कहिलेसम्म महिलाले ज्यान गुमाउनु पर्ने हो ? यो यक्ष प्रश्नको न राज्य, न राजनीतिक दल, न सामाजिक अभियन्ता वा संघसंस्था न अरु कोहीको जवाफ दिन तयार छन् । छाउपडी कुप्रथाका कारण कहिलेसम्म निम, कविता, कमलाहरुले ज्यान गुमाइरहने जवाफ त खोज्नै पर्छ ।
