पूर्वप्रधानन्यायाधीश सुशीला कार्कीको आज राती ९ बजे सपथ ग्रहण
पढ्न लाग्ने समय :
न्युज नेपाल समाचार
धनगढी, भदौ २७ गते । पूर्वप्रधानन्यायाधीश सुशीला कार्कीलाई अन्तरिम सरकारको प्रमुख नियुक्त गर्ने विषयमा सहमति जुटेको छ । सहमति जुटेसँगै राष्ट्रपति रामचन्द्र पौडेलले कार्कीलाई आजै (शुक्रबार) नियुक्त गरी शपथ गराउने भएका छन् । उनको आज (शुक्रबार) राती ९ बजे पद तथा गोपनियताको सपथ ग्रहण हुने छ ।
राष्ट्रपतिका प्रेस विज्ञ किरण पोखेरलका अनुसार अन्तरिक सरकारका प्रमुखका रुपमा कार्कीको राती ९ बजे शीतल निवासमा सपथ ग्रहणको तयारी भइरहकेो छ ।
यसअघि नयाँ सरकार गठनका लागि छलफल गर्न पूर्वप्रधानन्यायाधीश कार्कीसहितको टोली शीतल निवास पुगेको थियो । कार्कीसहित जेनजी अभियन्ता तथा हामी नेपाल संस्थाका अध्यक्ष सुदन गुरुङ र अधिवक्ता ओमप्रकाश अर्याल पनि छलफलका लागि राष्ट्रपति निवास पुगेका थिए । कार्कीलाई अन्तरिम सरकारको प्रमुखमा चयन गर्ने विषयमा सहमति जुटे पनि संसद् विघटनका विषयमा सहमति जुट्न सकेको थिएन । राष्ट्रपतिका सञ्चार विज्ञ पोखरेलले ‘यसबारे कार्कीको नियुक्तिसँगै सहमतिको औपचारिक जानकारी आउने’ जानकारी दिए ।
यसअघि भदौ २३ र २४ गतेको जेनजी आन्दोलनको दबाबपछि प्रधानमन्त्री केपी शर्मा ओलीले मंगलबार राजीनामा दिएका थिए । असामान्य परिस्थितिलाई ध्यानमा राख्दै दिइएको राजीनामा राष्ट्रपति पौडेलले सोही दिन स्वीकृत गरेका थिए ।
शुक्रबार साँझ राष्ट्रपति पौडेल र पूर्वप्रधानन्यायाधीश कार्कीबीच निर्णायक कुराकानी भएको थियो । शीतल निवासमा राष्ट्रपति पौडेल र पूर्वप्रधानन्यायाधीश कार्की दुई जनाले मात्रै अलग कोठामा कुराकानी गरेका थिए ।
छलफलका लागि शीतल निवास बोलाइएका जेनजी प्रतिनिधि र अन्य पक्षहरूलाई अलग अलग कोठामा राखिएको थियो ।
