त्रिनगर नाकामा अटोरिक्सा चालकहरुको मनपरी भाडा असुलीले यात्रुहरु हैरान
पढ्न लाग्ने समय :
राजन जैगडी
धनगढी असोज ,०७
कैलालीको त्रिनगर भन्सार नाकादेखि धनगढीसम्म सन्चालन हुने विद्युतीय रिक्सा चालकहरुले यात्रुहरुसँग मनोमानी रुपमा भाडा असुल्ने गरेको गुनासो बढ्दै गएको छ । चाडबाडको लागि भारतका विभिन्न शहरबाट घर फर्किने नेपालीहरुसँग विद्युतीय रिक्सा चालकहरुले तोकिएको भन्दा निकै बढी भाडा असुल्ने गरेको पीडितहरुको गुनासो छ
चाडबाडका लागि घर फर्किने नेपालीहरुको केही दिनयता सिमानाकामा निकै घुइचो लाग्ने गरेको छ । घर फर्किने नेपालीहरुसँग विद्युतीय रिक्सा चालकहरुले मनपरी ढंगले भाडा असुल्ने गरेको पाइएको छ । भुक्तभोगी यात्रुहरुका अनुसार त्रिनगर भन्सार नाकादेखि धनगढी चौराहासम्म अटोरिक्सा चालकहरुले पाँच सय भारुदेखि एक हजार रुपैयाँसम्म असुल्ने गरेका छन् । भन्सार नाकादेखि धनगढी चौराहसम्म करिब दुई किलोमिटरको दुरीमा मात्रै अटोरिक्सा चालकहरुले निकै बढी भाडा लिने गरेका छन् ।
भारतका विभिन्न शहरमा रोजगारी गरेर फर्किने नेपालीहरु आफ्नै देशमा पनि लुटिनुपर्ने अवस्थाका कारण निकै निरास छन् भुक्तभोगी यात्रुहरुले प्रहरी, ट्राफिक प्रहरी र अटोरिक्सा चालकबीच मिलेमतोमा मनपरी ढंगले यात्रुहरुसँग भाडा असुल्ने गरेको आरोप लगाए । भारतबाट घर फर्किएका बिष्णु दमाईले अटोरिक्सा चालकहरुले यात्रुहरुलाई बढी भाडा तिर्न बाध्य बनाउने गरेको गुनासो गर्नु भयो ।
भारतबाट घर फर्किएका नेपालीहरुले सिमानाकामा अटो रिक्सा चालक र व्यवसायी तथा बसपार्कमा बस धनी र कन्डक्टरहरुले लगेजको बहानामा जथाभावी रुपमा भाडा असुल्ने गरेको पीडा पोख्छन् । उसो त नेपाल प्रहरीले त्रिनगर सिमा नाका र बसपार्कमा यात्रु सहायता कक्ष स्थापना गरेको छ । तर आखा अगाडी यात्रु लुटिदा पनि सहायता कक्षमा रहेका सुरक्षाकर्मीहरु मुखदर्शक बनेको अवस्था छ । त्रिनगर नाका हेर्ने परासन प्रहरी चौकीका प्रहरी नायव निरिक्षक नैनसिंह कार्कीले चाडबाडलाई लक्षित गरी छड्के चेकजाँच भइरहेको बताउनु भयो । उहाँले यात्रुहरुसँग तोकिएको भन्दा बढी भाडा असुल्ने अटोरिक्सा चालकलाई कारबाही समेत भइरहेको जानकारी दिनु भयो । अटोरिक्सा चालकसँग प्रहरीको कुनै मिलोमतो नभएको दाबी गर्दै उहाले कुनै गल्ती भए कार्वाही सहन तयार रहेको पनि बताउनु भयो ।
राजमार्ग व्यवस्थापन तथा प्रदेश ट्राफिक प्रहरी कार्यालयले बढी भाडा असुल गर्नेहरुलाई कार्वाही गरिने जनाएको छ । चाडबाडको घर फर्किने नेपालीहरुले सीमा नाकादेखि बसपार्कमा समेत लुटिनु पर्ने अवस्था किन हरेक वर्ष दोहोरिन्छ भन्ने सवाल अहिले पनि टड्कारो बनेको छ ।
