कास्की र दाङ कारागारबाट कैदीबन्दी निस्किए
पढ्न लाग्ने समय :
न्युज नेपाल समाचार
धनगढी, भदौ २४ गते ।
जेनजी प्रदर्शनकारीहरुले कारागारमा आक्रमण गरेपछि कास्की र दाङ कारागारबाट एक हजार एक सय भन्दा बढी कैदीबन्दी निस्किएका छन् । मंगलबार दिउँसो कारागारको सुरक्षा व्यवस्था कडा बनाएको प्रहरी साँझ परेसँगै फर्किएको थियो । त्यसपछि जेनजी प्रदर्शनकारीहरु कारागार प्रवेश गरेका थिए । कास्कीबाट ९ सय भन्दा बढी कैदीबन्दी निस्किएको प्रहरीले जनाएको छ । कास्की कारागार प्रशासनका अनुसार कारागारमा ९८१ जना कैदीबन्दी रहेका थिए ।
त्यस्तै, तुलसीपुर कारागारबाट एक सय २४ कैदीबन्दी निस्किएका छन् । र्मगलबार साँझ पाँच बजेतिर कारागारको मूल गेटको पर्खाल तोडेर कैदीबन्दीहरु निस्किएको बताइएको छ ।
जेनजी प्रदर्शनकारीहरुले कारागारभित्र होहल्ला गर्दै गेट तोड्न खोजेपछि सुरक्षार्थ खटिएका सुरक्षाकर्मीले हवाई फायर गरेका थिए । तर, कैदीबन्दीहरु निस्किएको कारागार प्रमुख गिरबहादुर सेजुवालले बताए ।
एउटा ब्लकमा बसेका कुल एक सय ७९ कैदी बन्दी मध्य एक सय २४ जना जेल तोडेर भागेपनि थप ५५ जना भने आफूहरू नजाने भन्दै कारागार भित्रै बसेको कारागार प्रमुख सेजुवालले बताए ।
