कञ्चनपुरमा वृद्धा आमाको हत्यापछि फरार भएका श्रेष्ठ भारतबाट पक्राउ
पढ्न लाग्ने समय :
धनगढी : कञ्चनपुरमा वृद्धा आमाको हत्यापछि फरार भएका हरिप्रसाद श्रेष्ठ भारतबाट पक्राउ परेका छन्। जिल्लाको दोधाराचाँदनी नगरपालिकामा सौतेनी आमा र बहिनीमाथि खुकुरी प्रहार फरार भएका श्रेष्ठ पक्राउ परेका हुन्। उनले वृद्धा आमाको हत्या गरेका थिए भने, अर्की एक जनालाई गम्भीर घाइते बनाएका छन्।
जिल्ला प्रहरी कार्यालय कञ्चनपुरका अनुसार मङ्गलवार साँझ दोधाराचाँदनी नगरपालिका वडा नम्बर ४ सुर्खेती टोलका करिब ५५ वर्षीय श्रेष्ठले आफ्नै सौतेनी आमा ७५ वर्षीया बिन्द्रा श्रेष्ठको हत्या गरेका हुन्। साथै ५० वर्षीया भगवतीदेवी माझीलाई गम्भीर घाइते बनाएका थिए।
घटनापछि फरार रहेका श्रेष्ठलाई खोज्ने क्रममा नेपाल प्रहरी र भारतीय सुरक्षाकर्मीको समन्वयमा भारतको बरेलीमा लुकेर बसेको अवस्थामा पक्राउ गरिएको हो। पक्राउपछि उनलाई कानुनी प्रक्रिया अनुसार नेपाल ल्याइएको प्रहरीले जनाएको छ।
घाइते भगवतीदेवी माझीलाई सुरुमा महाकाली प्रादेशिक अस्पताल महेन्द्रनगरमा उपचार गरिएको थियो। तर अवस्था गम्भीर बन्दै गएपछि थप उपचारका लागि भारतको भोजिपुरा लगिएको छ।
प्रहरीका अनुसार पुरानो जग्गा–जमिन विवादका कारण घटना भएको प्रारम्भिक अनुसन्धानमा खुलेको छ। घटनाबारे थप अनुसन्धान भइरहेको प्रहरीले जनाएको छ।
