इण्डोनेसियामा बाढी, पहिरोबाट ५ जनाको मृत्यु
पढ्न लाग्ने समय :
इण्डोनेसियाको पश्चिमी जाभामा आएको बाढी र पहिरोमा परी ५ जनाको मृत्यु भएको छ भने ७ जना बेपत्ता भएका छन् । पश्चिम जाभा प्रान्तमा आएको बाढी र पहिरोले सयौं घर र पूर्वाधारमा क्षति पु¥याएको हो । पाँच जनाको शव फेला परेको छ र सात जना बेपत्ता भएको एक अधिकारीले बताएका छन् । गत हप्तको मंगलवारदेखि शुरु भएको प्राकृतिक प्रकोपले सुकाबुमी क्षेत्रका ५८९ घरमा क्षति पु¥याएको र १ हजार ४०० बासिन्दालाई विस्थापित गरेको छ । प्रान्तीय विपद् व्यवस्थापन तथा न्युनिकरण निकायका प्रवक्ता हादी रहमतले विपद्का कारण १० वटा पुल भत्किएकाले बासिन्दाको आवतजावतमा बाधा पुगेको बताउनु भयो ।
बेपत्ता भएका सातमध्ये पाँच जना पहिरोको शिकार भएका छन् भने बाँकी दुईजना बेपत्ता हुनुको कारण नखुलेको रहमतले बताउनु भयो । पाँच पहिरो पीडितको खोजी कार्य प्रभावित क्षेत्रमा केन्द्रित रहेको र अन्य दुईको खोजी कार्य यी क्षेत्रभन्दा बाहिर भएको उहाँले बताउनु भयो । उहाँकाअनुसार विस्थापितहरूलाई खान, बस्न, औषधि र अन्य अत्यावश्यक वस्तुहरू उपलब्ध गराउन दुईवटा विस्थापन केन्द्र स्थापना गरिएको छ ।
