आज काठमाडौं सहित ३४ जिल्लामा बाढीको जोखिम
पढ्न लाग्ने समय :
न्युज नेपाल समाचार
धनगढी, असोज १ गते । आज बुधबार राजधानी काठमाडौं लगायत देशका ३४ जिल्लामा बाढीको बढी जोखिम देखिएको छ ।
बाढी पूर्वानुमान महाशाखाका अनुसार आज कोसी, नारायणी, बागमती, कर्णाली र महाकाली नदी तथा यिनका सहायक नदीहरूमा बहाव बढ्ने सम्भावना रहेको छ । आज बिहानसम्मको जल प्रवाह मापनमा भने यी नदीहरूमा बहाव सतर्कता तहभन्दा तल रहेको छ । आज कन्काई, कमला, पूर्वी राप्ती, पश्चिम राप्ती र बबई नदीमा पनि बहाव बृद्धि हुने अनुमान छ ।
बाढी पूर्वानुमान महाशाखाका अनुसार आज दोलखा, सिन्धुपाल्चोक, पाल्पा, रुपन्देही, नवलपरासीपूर्व, नवलपरासीपश्चिम, डोटी, कैलाली र आसपासका जिल्ला भई बग्ने साना नदीको बहाव उल्लेख्य बढ्ने र आकस्मिक बाढीको मध्यम जोखिमको उच्च सम्भावना रहेको छ ।
त्यस्तै, इलाम, झापा, मोरङ, काठमाडौँ, ललितपुर, भक्तपुर, बारा, पर्सा, चितवन, कास्की, तनहुँ, स्याङजा, म्याग्दी, बागलुङ, पर्वत, गुल्मी, अर्घाखाँची, बाँके, बर्दिया, दाङ, सुर्खेत, दैलेख, कञ्चनपुर, डडेलधुरा, बैतडी, दार्चुला र आसपासका जिल्ला भई बहने केही साना नदीको पनि बहाब उल्लेख्य बढ्ने र आकस्मिक बाढीको मध्यम जोखिमको मध्यम सम्भावना रहेको बाढी महाशाखाले उल्लेख गरेको छ ।
बाढी महाशाखाले यी नदी तटीय क्षेत्रहरूमा सतर्कता अपनाउन सर्वधारणमा अनुरोध गरेको छ ।
