अन्तरिम सरकारका मन्त्रीहरुबारे छलफल सुरु
पढ्न लाग्ने समय :
न्युज नेपाल समाचार
धनगढी, भदौ २७ गते ।
पूर्वप्रधानन्यायाधीस सुशीला कार्की अन्तरिम सरकारको प्रमुख बन्ने टुंगो लागेपछि मन्त्रीहरुबारे छलफल सुरु भएको छ । शुक्रबार साँझ राष्ट्रपति रामचन्द्र पौडेल र पूर्वप्रधानन्यायाधीश कार्कीबीचको छलफलपछि उनलाई अन्तरिम सरकारको प्रमुख नियुक्त गर्ने टुंगो लागेको हो । पूर्वप्रधानन्यायाधीस कार्कीलाई आजै (शुक्रबार) राति ९ बजे प्रधानमन्त्री पदको शपथ खुवाउने तयारी भएको छ ।
शपथको तयारीसँगै कार्की मन्त्रिपरिषद् गठनको तयारीमा जुटेकी छन् । स्रोतका अनुसार राष्ट्रपति रामचन्द्र पौडेलले कार्कीलाई मन्त्रीहरूबारे निर्णय गरेर आउन भनेका छन् । ‘सरकार तपाईँले चलाउने हो, सल्लाह गरेर सूची ल्याउनुहोला,’ राष्ट्रपतिको भनाई उधृत गर्दै स्रोतले भनेको छ ।
कार्कीलाई अन्तरिम सरकारको प्रमुखमा नियुक्त गर्नेबारे बिहीबार नै सहमति जुटेको थियो, तर संसद विघटनका विषयमा भने सहमति जुट्न सकेको थिएन । दुवै पक्ष आ–आफ्नो अडान यथावत् रहेका थिए । तर, अन्त्यमा जेनजी अभियन्ताको चेतावनी र सेना प्रमुखको संकटकालको अवस्था आउन सक्ने सुझावपछि संसद् विघटन गर्ने सहमति जुटेको हो ।
